Footer

Kas kadakkel ti karamba a singkamas, sentro ti atension iti Partuat ken Patanor trade fair

VIGAN CITY – Di nakappapati ngem kas kadakkel ti karamba ti singkamas a produkto ti San Emilio, Ilocos Sur nga indispley da Mayor Lorenzo Bragado, Jr. iti Partuat ken Patanor trade fair kas paset ti pannakarambak ti Kannawidan Ylocos Festival a naangay iti Siudad ti Vigan manipud Enero 27 agingga iti Pebrero 3, 2008.

Panggep ti trade fair ti pannakaidur-as dagiti kangrunaan a produkto a pakabigbigan tunggal ili ken agbalin a pamastrekan dagiti lokal a gobierno iti probinsia.

Nadumaduma dagiti produkto nga imbaba ti grupo da Mayor Bragado kas iti kamote, karabasa, tarong, bukbukel, tapey (arak manipud iti bagas) ken diro ngem ti kasla kadakkel iti karamba a singkamas ti ad-adda a nangawis iti imatang dagiti maisar-ong a bisita.

Kinuna ni Mayor Bragado a dua a tawenen ti kalakay ti singkamas a ti bungana ti pagtataudan dagiti bukel nga imulada iti tinawen.

“Kinalimi tapno isalipmi iti “Pinaka” (salip iti kadakkelan a produkto) ken maipakitami no kasano kadakkel ti pagbalinan ti singkamas,” kinuna ni Mayor Bragado.

Naammuan iti mayor a nagtaud iti baba ti nasao a singkamas nga immulada iti ilida.

“Kadagaanna ti San Emilio,” kinuna ti mayor idinto nga impalgakna nga adda pay tallo a puon a pagtataudan iti bin-ienda iti tinawen.

“Makaalakami iti 5,000-10,000 a bukel ket mamulaanna ti maysa nga ektaria,” kinuna ni Mayor Bragado.

Sabali pay a nalatak a produkto ti San Emilio ti diro agsipud ta kas kunana, 100% nga awan ti laokna.#