Footer

KASAMA, naiyussuat

VIGAN CITY – Inwaragawag ni Gov. Deogracias Victor “DV” Savellano ti pannakairugi ti Katuday, Saba, ken Marunggay (KASAMA) project bayat ti maysa a seminar dagiti barangay nutrition scholars iti provincial capitol idi Hunio 16.

Segun ken  ni Savellano, inunana a pinakaammuan dagiti kameng ti BNS mainaig iti nasao a programa ta dagitoy ti ad-adda a maseknan iti nutrision kadagiti amin a barangay iti probinsia.

“Ammok nga agbalin nga epektibo daytoy a proyekto no addakayo a kaduami a mangipakaammo kadagiti bumarangay,” kinuna ti gobernador.

Naipakaammo iti launching dagiti baro a barayti ti saba, katuday ken marunggay a napintas a maimula, no kasano a taripatuen ida, dagiti benepisio a mabalin a maala iti panagmula kadagitoy ken dagiti nutrision nga itdenda.

Puntiria ti gobierno probinsial a maimula ti katuday, saba ken marunggay a nainsaknapan babaen ti panangmanehar ti BaRangay Demofarm.

Kabayatanna, nagdalan dagiti mangtartarawidwid iti turismo iti probinsia ken kadagiti nadumaduma nga ili iti Ilocos Sur iti tallo nga aldaw a seminar idi Hunio 16-18 babaen ti panagkinnammayet ti gobierno probinsial ken ti Departamento ti Turismo iti rehion uno.

Karaman kadagiti partisipante iti nasao a panagsanay dagiti kameng ti Ilocos Sur Provincial Tourism Office ken dagiti municipal ken city tourism officers/coordinators dagiti ili ken siudad iti probinsia. Naiyadal iti seminar ti tourism reception and tour guiding techniques.

Kas paset ti seminarda, nakipaset dagiti partisipante kadagiti naisagana a modules tapno dagitoy ti ipakatda kadagiti masakupanda ken makaisaganada iti epektibo a programa tapno maitandudo dagiti napipintas ken napnuan pakasaritaan a lugar iti ilida a mabalin a pasiaren dagiti turista, lokal man wenno ganggannaet.

Nagpaay a resource speakers iti tallo nga aldaw a panagsanay da Henry Pingol para iti effective customer service ken Bien Claravall iti basic tour guiding techniques.#