Sinursuran: Kolum ni Jobert M. Pacnis

(Maudi a paset)

Nupay kasta, adu latta a grupo ti saan a makaidna iti nasao nga isyu. No pudno a natalged ti agas, apay nga up-uppat pay laeng a pagilian iti sangalubongan ti nangpadas kadaytoy? Iti sibubukel nga Asia, ti pagiliantayo ti kakaisuna a nangaramat iti Dengvaxia kas solusion iti agbalin a nakana nga epekto ti dengue.

Iti imbestigasion a mapasamak, makananamatayo ngata iti turongenna?

Wenno agbuyatayo laeng iti moro-moro a mapasamak?

Agpapan kadagitoy, naulimek latta ni Aquino. Awan ti kimkimawna.

Rumbeng koma pay nga isu ti maysa a kangrunaan nga agsao. Iti kasta, ad-adda a maalay-ayan ti rikna dagiti maseknan.

Iti biang ti Malakaniang, kinunana a di rumbeng ti panag-panic. Ad-adda laeng a makariribuk iti tunggal maysa.

Impaganetgetna ketdi ti panagbalin a kalmado, obserbaren dagiti ag-700,000 nga indibidual a nabakunaan. No sallukoban ida ti sagubanit, ipakita a dagus dagitoy iti doktor.

Kas kuna met laeng ti gobierno, naka-focus-da kadagiti biktima. Kinapudnona, adda hotline-da a mabalin a pangipakaammuan kadagiti concerns kadagiti nabakunaan.

Ti pay yanna nga adat daytoy a isyu, ti pannakasarsarita manen dagiti mannursuro a nagbalin a dakkel a katulongan ti DOH iti pannakaiwayat ti proyekto.

Mabalin nga isuda ti pabasolen dagiti nagannak no adda man bilang mapasamak kadagiti annakda.

Aglalo ket addada dagiti awan dengdenggenna a sao a nagannak. Ibarikakkakda latta dagiti im-impen ti riknada. Saandan a simpuonen dagiti pasamak?

A kasla ketdin dagiti mannursuro ti akimbasol iti amin. Ngem no amirisen, nagbalin laeng nga instrument da ma’am ken sir iti panagballigi ti proyekto. Sayang met ti billion a pisos a ginastos no kua.

Maysa pay a mabalin nga ibunga ti isyu ti pannakaimaldit ti panagbuteng iti ania man nga immunization-to a mapasamak iti masungad.

Mabalin a saanton a kayat dagiti nagannak ti agpirma iti waver.

Saandan nga ikankano dagita a programa.

Pagangayanna, adu ti masayang a kuarta a nausar iti panaggatang kadagiti agas.

Ngem ti nakaam-amak, no awanton ti mayat a mabakunaan, ti panagrairanto ti sakit a mabalin koma a naleplepan iti panagbakuna. Ngem gapu ta adda ita ti stigma iti bakuna nga inyeg ti Dengvaxia, saan nga adayo daytoy a mapasamak.

Masapul ngarud ti naan-anay a panagkuti ti agdama nga administrasion tapno malawlawagan ti amin.

Kadagiti agim-imbestiga, ammuenda ti sibubukel a pasamak. They must go deeper… and deeper… and deeper in their investigation, kasta.

Saan koma nga agpipin-nangato iti isbo iti pa-nangduktal iti kinapudno. Agkaykaysada ketdi a mangammo iti kinapudno.

Ken nasken nga adda contingency plan ti gobierno iti kaso a pumudno ti imbatad ti Santofi.

Kada ma’am ken sir a nangbayabay iti DOH, akuenda a paset dayta ti trabahoda. adda panagpalia no maminsan. Ngem masapul ti isesekkad. Masapul ti panangsango iti parikut.

No kaano a maalay-ayan ti danag dagiti nagannak ni Ailyn, addan iti gobierno dayta. Matdada lattan nga agur-uray iti resulta ti maiwayat nga imbestigasion.

Kabayatan nga awan pay ti banag dagiti imbestigasion, maipaganetget ti panagpaliiw ti tunggal maysa. Agbalin a vigilante, uray sagpaminsan laeng. #