Kasano kasagana ti prosekusion iti impeachment trial ni CJ Corona?

No malusotan ni Supreme Court Chief Justice Renato Corona ti impeachment complaint maikontra kenkuana, kangrunaan a pakaituduan ti pammabasol kadagiti ‘naglati’ nga agilinlinteg a prosecutors gapu iti dakkel a nagkamtudanda iti panangisaganada kadagiti ebidensia a pangsirutda iti tengnged ni Corona, ken ti nalupoy a panangipresentada kadagiti ebidensia tapno maawat iti korte.

Kitaentayo ti maysa a naipangruna a napasamak iti umuna a dua a lawas ti impeachment trial. Kas nailanad iti impeachment complaint nga indatagda, nagsasaganad dagiti articles of impeachment nga ipresentarda iti impeachment court a mangpaneknek a linabsing ti chief justice ti pagrebbenganna ket rumbeng laeng a maikkat iti puestona. Ngem ania ti napasamak? Inyunada ti Article 2 no sadino nga inakusaranda ni Corona a nagpalta a nagisubmite iti statement of assets and liabilities and networth kas intuding ti Konstitusion; sumagmamano kadagiti sanikua ni Corona ti saan a nairaman iti deklarasionna iti assets, liabilities ken net worthna a maysa a panaglabsing iti anti-graft and corrupt practices act; ken nagukkon kadagiti ill-gotten wealth, napapateg a sanikua, ken bank accounts iti bangko a naglaon kadagiti dadakkel a deposito.

Inkalintegan dagiti prosecutors nga inyunada ti maikadua nga article of impeachment agsipud ta saanda pay a sisasagana a mangipresentar iti umuna nga article of impeachment. Pagsayaatanna ta impalubos ti impeachment court a ti maikadua nga article of impeachment ti iyunada.

Ngem kapaliiwan ti kaawan ti eksperiensa dagiti prosecutors iti panangipresentada kadagiti ebidensia babaen ti pinaayabanda a saksi tapno maawat iti impeachment court.  Kayariganna ti napuskol a pader dagiti bangen nga impalapal dagiti abogado ti depensa iti pannakairuar ti SALN a narigat a madupir dagiti prosecutors. Pagyamananna, babaen ti panagsaludsod ni Sen. Franklin Drilon, naibutaktak nga adda iti ikut ni Supreme Court Clerk of Court Enriqueta Vidal ti statement of assets, liabilities and network ni Corona ket babaen ti pammilin ti impeachment court, kapilitan a naidatag daytoy.

Nalukaisan pay ti inexperience ti prosekusion iti saan a panangawat ti impeachment court kadagiti ebidensia a pangpaneknek a naggukkon ni Corona iti pagduaduaan iti pannakatagikuada a sanikua. Kas kuna ni Sen. Juan Ponce Enrile, presiding judge ti impeachment court, saan a nasayaat ti pannakaisurat ti complaint ket kasapulan a maamendaran ti complaint.

No kastoy laeng, makalusot la ketdi ni Corona kadagiti akusasion maikontra kenkuana. Dakkel la ketdi a piltak iti rupa dagiti agilinlinteg a maak-akusaran a nangiduros iti impeachment complaint iti Senado a dida naisagana a nasayaat.#