sinursuran-banner-sqSinursuranNi Jobert M. Pacnis

Kasano Ngamin, Aya, A Disiplinaen Dagiti Ubbing?

SINURSURAN

Kolum ni Jobert M.Pacnis

(Umuna a paset)

SABSABALI itan dagiti ubbing… Saanen a kas idi…

Nalabit, nangngegmon dayta a sentimiento dagiti mannursuro.

Ta agpayso man met daytoy a kapaliiwan. Saanen a kas idi panawen da apong nga iti maysa laeng a panangkusilap kadagiti ubbing, umalikeskesdan wenno ammodan ti aramidenda. Ammodan ti aramidenda tapno saandanto a mapagungtan.

Ngem ita, no kusilapam dagiti ubbing, kusilapandaka met! Pagsawam wenno pagungtam ida, dayamudoman wenno sungbatandaka iti pabaliktad!

Naisabsabali a talaga dagiti ubbing itoy a henerasion.

Ket daytoy ti dakkel a karit, saan laeng a kadagiti nagannak no di ket dagiti mannursuro. Matdada a mangpanunot kadagiti istratehia no kasano a matubayda latta dagiti ubbing a kas makaay-ayo ken mapangnamnamaan nga umili.

Isu a saantayon a masdaaw kadagiti mabuybuyatayo iti telebision a naireklamo ni ma’am wenno ni sir gapu iti panangdissona iti estudiantena. Sabali laeng dagiti saan a mairepreport iti telebision. Ad-adu nga amang ti saan a maiparparang iti media. Daytay mapagsasaritaan lattan tapno di rumaba ti isyu.

Agpayso a ti mannursuro, modelo iti amin a banag. Kupikopna amin a kinaimbag, kinapasensiosa ken kinatakneng.

Ngem kas maysa a parsua, addaan met iti rikna. Saan a robot tapno dina ammo ti umingar no kasta a magamsaw la unayen ti kalinteganna, aglalo ti kinataona. Ania, bay-anna lattan a mabastos?

Kas natratartayon ditoy a kolum, protektado dagiti ubbing ita iti polisia ti Child Protection. Bassit laeng a pannakasagid kadakuada, pisikal wenno berbal, adda paglugaran ti asino man iti ima ti linteg.

Nga isu ti ab-abusuen ita dagiti ubbing— uray payen dagiti nagannak. Panguartaanda no dadduma. Wen, mapaspasamaken ti kastoy.

Ket ditoy a maabuso, mailupitlupit dagiti mannursuro. Saanen nga ipangpangag ida dagiti ubbing no maminsan. Yaleng-alengdan dagiti maikadua a nagannak kadakuada agingga a dumteng iti punto a marabngisen ti dayaw ti mannursuro.

Iti kinabastos nga ipakpakita dagiti ubbing, aglalo no kasta a kanayon a masita ti madi nga aramidda, saan met no kuan a masarkedan ni ma’am wenno ni sir ti riknada ket makaaramidda iti saan a rumbeng (panagbaut wenno panagsao iti makasair).

Nga outlet-na laeng, piman, iti agleplepiasen a riknada a kanayon a mabastos.

Pagdaksanna, uray basol ti ubing, basol latta da ma’am ken sir. Ta rumbeng kano ngarud nga agbalinda a modelo, managpasensia, managayat kadagiti ubbing ta dagitoy ti pagbibiaganda—wen, addada dagiti nagannak a kasta ti kapanunotanda.

Ngem no di maipeksa ni ma’am wenno ni sir ti riknana, kasano ngaruden ti salun-atna a maapektaran? Pagaammotayo nga adu a nakana a sakit ti ibunga ti stress. Kasano ngaruden ti pamiliana a mangnamnama kenkuana no makaala iti nakana a sagubanit?

Paglugaran itan dagiti mannursuro?

Maipakpakat ti kanayon a pammagbaga kadagiti ubbing. Akmen dayta ni mannursuro iti inaldaw. No dadduma, umabot payen iti one-on-one counseling. Ti nasakit, kalpasan dayta, agpukaw manen a kas asuk dagiti naibalbalakad, naipalpalagip kadagiti ubbing.

Kasano ngamin, aya, a disiplinaen dagiti ubbing iti agdama a panawen?

Kunada kadagiti training, seminar a masapul nga ipakat ti positive discipline.

Positibo a panangdisiplina? Kasano dayta?

Adda dagiti addang a masapul nga ipakat sakbay nga agsibo ti dara ket maiburuang ti unget/panagunget a naynay a mangibunga kadagiti mabalin a pagbabawyan iti udina.

Umuna ditoy ti panangilista iti panunot dagiti mabalin a rason no apay nga inaramid ti ubing ti maikaniwas nga impakitana. Ta ania man kano nga ar-aramiden, ipakpakita dagiti ubbing, adda dakkel a rason iti likudan dagitoy.

Kas pangarigan no natagari unay iti uneg ti klase.

Mabalin a rason no apay nga ar-aramiden ti ubing daytoy ket kayatna ti “mapansin” iti klase; wenno saan a maikankano idiay balayda ket iruarna amin a kinaalikuteg, ti marikriknana iti pagadalan kas kalasugan ti dagensen iti barukongna.

(Adda tuloyna)