sinursuran-banner-sqSinursuranNi Jobert M. Pacnis

Kasano pay dagiti tagainep?

“AWAN bola iti hueteng itay!” nailadawak ti panaglagaw iti reaksion dagiti kailian iti dayta nga aldaw. “Kasano ngatan dagiti taya?”

Hueteng? Mabalin a siddaawen ta nabayagen a nasuktan daytoy iti kunkunada nga STL wenno Small Town Lottery. Ngem isu met ti nakairuaman dagiti umili iti dayta a kita ti ay-ayam wenno kunaentayo kad’ lattan a sugal. Saan a kasta kasikat ti STL nga awagna.

Iti isipko, nakunak a di agbayag, addanto met laeng ti STL. Na-raid (a napanunotko met laeng a dagus nga imposible ta legal gayamen daytoy, saan a kas idi iti hueteng) la siguro wenno adda teknikal a parikut.

Ngem apay ngamin a kasta la unayen ti pannakariribuk no awanen ti STL wenno dagiti makunkuna a game of chance ti Philippine Charity Sweepstake Office wenno PCSO?

Iti pakasaritaan ti kayumanggi a puli, nagbalinen a paset ti biagna ti sugal. Impluwensia daytoy dagiti ganggannaet a nangsakup iti pagilian. Ket maysa dayta maaw-awagan idi iti hueteng ti naparnuay a nakailuodan ti adu nga umili. Babaen ti panagtayada, mangnamnamada a mangabak ket makaramanda bassit iti gin-awa iti panagbiag.

A no dakkel met ti abaken, no kabaelanda ti pumusta iti dakkel, mabalin a dayta ti mangilung-aw kadakuada iti rigat. Mabalin pagpuonanda iti negosio.

Idi agtanoy, adu ti nangkontra iti hueteng ta ilegal kano. Saan a sumsumrek iti kaban ti pagilian ti mapaspastrek itoy a kita ti sugal. Masmasnop dagiti nakatugaw a lider a bumakbaknang gapu iti payola a maaw-awatda.

Nagbalin ngarud a sangalubongan a damag ti pannakatakias wenno pannakapadisi iti puesto ti dati a pangulo ti pagilian gapu iti hueteng. Nga agpapan kadagitoy, ibagbagana pay laeng nga inosente iti pammabasol kenkuana.

Ta asino ngamin, aya, ti mangaklon ti maipabpababasol kenkuana? No politikonto pay laeng, adu a pamuspusan ti maar-aramid tapno mapaneknekanna (kuno/kano) nga inosente. Ngem no ordinario nga umili, nalaka laeng a maipiskot.

Iti panagsubli ti hueteng, nagbalin daytoyen a legal babaen iti awag nga STL. Nanamnama ti panagdiretso iti kaban ti pagilian dagiti kuarta a mapastrek.

A mausar kadagiti ti gobierno para kadagiti umili!

Kangrunaanna, maipapaay a tulong kadagiti agkasapulan nga umili nga addaan iti nadagsen a sagubanit ti mapaspastrek iti lotto, kangrunaan a game of chance ti PCSO. Saan a matallikudan ti kinapudno nga adun a kailian ti agkamang iti charity ward ti PCSO para iti pinansial a tulong.

Iti pannakaipasardeng dagiti amin a game of chance ti PCSO, dakkel a pannakaikawa dagiti masao a suki dagitoy nga ay-ayam. Kadagiti mangnamnama a babaen itoy ket makalung-awda iti rigat, pannakaputed ti namnama ti kayatna a sawen.

Kabayatanna, adu dagiti ordinario nga umili ti maawanan iti panggedan. Iti tunggal ili, adun ti nagbalinen ti panagpatpatayada iti STL ti nagbalinen a regular a trabahoda. Daytoy ti pangbibiagda iti pamiliada.

Kasta man met laengen dagiti adda kadagiti outlet ti lotto iti sapasap a pagilian. Sumangkaadu met ti naawanan iti trabaho.

Ngem apay ngamin a napanunot ti agdama a pangulo ti pannakaisardeng dagitoy nga ay-ayam wenno sugal a tartarawidwidan ti PCSO?

Korupsion, dayta kano ti kangrunaan a rason.

Naduktalan kano ti gobierno a dakkel ti maaw-awan iti mapaspastrek ti PCSO iti tinawen. Manamnama a nasurok a P70 billion ti mapastrek iti tinawen ngem no apay nga adda laeng iti P12 B ti agparparang a napastrekna.

Dakkel ngarud ti mapukpukaw iti tinawen iti kaban ti pagilian!

Segun ken ni Sandra Cam a direktor ti PCSO, aramid kano dagiti heneral a kameng ti ahensia. Isuda ti mangleponglepong wenno mangyaw-awan kadagiti napastrek. Inayon pay kanon dita dagiti dadduma nga outlet a di gayam autorisado ti gobierno nga iggem wenno patpatarayen dagiti nangangato a tao iti kada probinsia. Banag a di sumsumrek iti pagilian ti mapaspastrekda.

Paneknekan daytoy nga uray napagbalinen a legal ti maysa a banag, adda latta ilegal a mapaspasamak. Wenno kinapudno a talaga a napudot ti kuarta. Ikagumaan latta no kasano ti panagakup kadagitoy a di pulos agling-et ken agbannog.

No pudno ngarud dagitoy a damag, masapul ti panagkuti ti gobierno tapno mapasungbat dagiti tao nga adda iti likudan daytoy.

Ta saan met a mairamraman dagiti ordinario nga umili iti aramidda! Sigurado ngamin a maisardengto metten ti tulong nga ipapaay ti opisina ti PCSO kadagiti agkasapulan iti pinansial a tulong nga addaan iti nakana a sagubanit.

Nupay kasta ti napasamak, impanamnama ti PCSO nga umanay pay iti makatawen ti pondoda a pangtulong kadagiti agkasapulan. Ngem maibusto daytan kalpasanna no dinto latta agsubli ti operasionda.

Adda met ketdi paripirip manipud iti gobierno a mabalin a maisublinto met laeng dagitoy a game of chance.

Apaman kano a madalusanda ti sibubukel nga ahensia!

Ngem pagam-amkan met dagiti dadduma ita ti rumrummuar a damag a mabalin a maisapribadonton ti PCSO. Sabalin ti mangpataray; sabalinton ti operator!

Ti nakas-ang, kasanon no maipaima kadagiti Tsaynis ti operasion ti PCSO?

Saan ngata a maputedto metten dagiti tulong kadagiti masaksakit?

Maawatantayo ti dedikason ti Pangulo iti panangparmekna iti kinakunniber iti pagilian. Pagaammotayo a daytoy a korupsion iti gobierno ti ad-adda a mangparparigat iti biag ti tunggal maysa. Imbes a maipaay a pagnam-ayan ti sapasap, addadad’ta dagiti agsisiim a mangsikbab kadagitoy a pagimbagan.

Saanda nga ikankano ti panagrigat dagiti kailianda. Ti napateg, ti pagsayaatanda!

Kitaen koma ngarud ti gobierno ti madagdagus a solusion ti pannakapukaw ti panggedan dagiti umili a naatalan iti pannakaisardeng amin a game of chance. Saan a rumbeng nga ibayag ti panangsolbar itoy a parikut ta saan met a mabalin nga itantan ti pannangan iti tunggal aldaw. Amangan laeng no mapanunot dagiti naawanan iti panggedan ti maikaniwas a pamuspusan tapno laeng agbiagda.

Iti pannakasursurat daytoy, maysa nga ili iti Laguna ti napaneknekan a limed ti panagsubli ti hueteng. Ipamatmatna laeng a nailasagen ti dadduma nga umili ti panangitalekna ti masakbayanna iti sugal. No saan, apay nga agtayada pay laeng itoy ilegal a sugal nga inkurimed ti pannakaipatarayna?

Ken nalawag nga indikasion nga ipamuspusanto latta ti mabisinan a pamilia ti agsapul iti iduolna kadagiti ipatpategna. A gungundawayan dagiti nabibileg tapno maituloyda ti operasionda nupay ilegal.

Iti koma ngarud iwayat nga imbestigasion ti gobierno, siguraduenna koma nga agpullo dagiti adda iti likudan ti maibagbaga a korupsion.

No ania ti naaramid iti sabsabali nga ahensia, kasta koma met ti maaramid kadagiti naduktalan a nagbasol.

Ken ni Angkuan a nangitaleksan iti masakbayanna iti sugal, maysa daytoy a pagpampanunotan. Idianna koman ti sugal ta awan a pulos ti maipaayna daytoy a pagimbagan.

Ken rugianna metten ti mangpanunot iti sabali a pamuspusan tapno biagenna ti pamiliana. Ta ditay la ammo no ania ti pagbanagan daytoy nga isyu.

Ken isardengna koman ti agkalagkalag iti ania man a matagainepna ta uray kasano kapintas ti tagainepna, bassit-usitto latta ti namnamana a makalung-aw gapu laeng iti sugal! ●