Kasano ti Agsurat iti Daniw a Sestina? (Maudi a paset)

NAKAPIDUTAK iti innem a keywords nga isu ti insuratko, a kastoy:

Sarwa – 1
Batonlagip – 2
Trono – 3
Kuada – 4
Ay-ayamda – 5
Korona – 6

Saankon a sinurot ti usual rhytmic pattern ti original a sestina. Total adda met dagiti mannaniw a di simmurot kadayta a pattern. Sestina-Iluko met daytoy a! Bukodko met a sestina. Inkur-itko nga umuna dagiti rhythmic pattern. Ket kastoy ti inaramidko.

1st stanza: 123456
2nd stanza: 516432
3rd stanza: 246153
4th stanza: 531642
5th stanza: 162543
6th stanza: 654321
7th stanza: 34
8th stanza: 25
9th stanza: 61

Kasta a rhythmic pattern: dua a sagdudua: 2 ken 3 ken nagbinnaliktad met dagiti umuna ken maikanem kadagiti sag-iinnem nga stanza; kadagiti tallo a maudi nga stanza, no sumaren, agtotalda iti 7.

Bigbigen ken adalen a nalaing dagiti rhythmic pattern. Mayat met ngatan a rhythmic pattern, ania? Artistic met, saan? Ta arte met ti daniw, kunam sa! Ken maysa nga artist ti poet. Saan laeng a kadagiti balikas ti pakasarakan iti arte no di pay kadagiti binatog wenno rhythmic pattern.

Okey! Nakapueston dagiti keywords. Dagiti laengen mangnayon iti aramidek. Konsentret: agpupudot dagiti dua a lallakay nga agis-istoria maipapan iti pulitika. Nasken nga agpupudotak met. Mabusor. Ma-suron. Kasuronko met dagiti kasuronda. Kondisionen. Kinitak ti relok. Rinugiak ti nagikur-it. Iti uneg laeng ti tallopulo a minutos, nalpasen ti sestina!

Ket nasuratko daytoy a daniw iti uneg ti Partas. Nagganas ti agay-ayam kadagiti balikas! Uray iti uneg ti pampasahero a lugan! Nalaka met la gayam ti agaramid iti sestina no urnosem nga umuna dagiti keywords! Kasla agigup iti digo ti saluyot ken rabong ken sabidukong a nasagpawan iti tinuno a paltat! Kasla agsurat iti gagangay a damag para iti police beat.

Daytoy man ne, ti inaramidko.

 

Dagiti Kappi iti Batonlagip

 

Ti sarming ket binurak ti sarwa

Dagiti kappi nga aggiginnuyodan iti batonlagip

Mabatbatibatda a simumulagat kadagiti trono

Saanda  a malagip a dida kua ti pagarupda a kuada

Ket ti pinniltakan iti rupa iti sabali ti ay-ayamda

Ket pilitda a gun-oden ti balangkantis a korona.

 

Ti panangtiritir kadagiti tengged ti ay-ayamda

Ket tunggal lamotenda a sarwa ken bukodda a sarwa

Itandudoda ken idirdir-i a kas korona

Ket nagbugsoten nabaddekanda a pagarupda a kuada

Iti poder, iti kongreso ken iti senado a pagarupda trono

Isuda dagiti kappi nga aggiginnuyodan iti batonlagip

 

Essemanda nga ilamina iti muging ti batonlagip

Ket tapno agnanayon a matugawanda ti kuada

Nasken nga agtalinaed kadakuada ti korona

Uray no pakanenda dagiti babassit iti bukodda a sarwa

Iti tunggal kumpas dagiti ramay nga ay-ayamda

Isu nga agiinnagawda kadayta essemanda a trono

 

No koma puniandat’ ulila a dulang ti ay-ayamda

A kas inaramid pudpudno a nakatugaw iti trono

Awan koman iti mangan pay iti sarwa

Awan metten ti agessem iti korona

Ta iti tunggal maysa addanton kuada

Nga isu dayta ti pudpudno a tugot ken batonlagip

 

Ngem kaykayatda iti mangan iti sarwa

Kaykayatda iti agiinnagaw iti korona

Kaykayatda agkikinnaruskos iti batonlagip

Awan iti mayat a paatur iti ay-ayamda

Kasda arrabas nga aniaman a madalapus kuada

Ngem nangisit unay dayta gamgamenda a trono

 

Ta  maburakto dayta a korona

Agpatingganto dayta nga ay-ayamda

Ket awanto a pulos mabati a kuada

Into bumaba ti adda iti pudno a trono

Matunawton dagita ginamgamda a batonlagip

Ta taraonda ti sarwa ti sabali ken bukodda a sarwa

Agsarsarwa dagiti agay-ayam iti trono

Ta ti batonlagip a korona ket kuada

 

Ti sarwa ti batonlagip

Ti korona nga ay-ayamda

 

Ket dagiti agay-ayam iti korona

Nanganda ken nagpakanda iti sarwa

 

Nakabold dagiti keywords.  

Ti imasna iti agaramid iti daniw, kailian, saan laeng panagay-ayam kadagiti balikas no di pay panagay-ayam kadagiti rhythmic pattern.

Padasem ti agaramid iti sestina a dimo insurat nga umuna dagiti keywords ket urayka la agkamaulaw. Ngem no isuratmo nga umuna dagiti keywords ken dagiti posision dagiti keywords, nalaka la gayam ti agaramid. Padasenyo met, kailian. Agaramidkayo iti awanan iti keywords ken iti addaan iti keywords ket takuatenyo ti misterio no apay nga adu dagiti agduyos ken mangipatpateg iti daniw. Uray no saan a maipablaak ti nasuratmo a daniw, umanayen daydiay satisfaction a mangited iti kired, sirmata ken namnama iti biag. Dayta satisfaction ket pannakapnek kadagiti babassit a banag a saan nga ikaskaso wenno saan nga ik-ikkan ti kaadduan. Kaadduan kunak, ta adu koman ti mannaniw. Kas iti nasaotayon idi, ti maysa a mannaniw ket co-creator ti Namarsua ta agparsua met iti kinapintas ti mannaniw babaen kadagiti linagana a balikas ken binatog. Saan laeng a balikas no di pay binatog.

Nagganas ti agay-ayam kadagiti balikas ania? Iramanmo metten ti agay-ayam kadagiti binatog ken rhythmic pattern.

Rugiamon ti agsurat iti SESTINA. Urayek ta ipablaakta, wen?