Kasanon dagiti manok ken asok, ‘Pang? (Maudi a paset)

Naragsakanak, iti baet ti danagko, ta tinurong a dagus ti anakmi ti kuartomi a yan ti altar. Intugawna ti nagkararag. Mapan ngata a dua minuto sa nalpas.

Adda met laeng pagnaan ti panangisursuro kenkuana, nakunak iti nakemko. Naikarik manen iti bagik nga ituloyko latta nga imula iti naganus pay laeng nga isipna ti pateg ti panagkararag.

Diko ketdi mababalaw no apay a kasta la unayen ti panangipateg ti ubingmi kadagiti dinguenmi. Kinapudnona, isu payen a mismo ti nagpaaramid kaniak iti kataw a pakaipupokan pay laeng dagiti kaibubuang a manokmi. Tapno di kano  kuroken dagiti dadakkel.

Nangrugi daytoy a panangipateg ti ubingmi kadagiti ayup idi isurotsurot daydi Manong Charlie a kasinsinko iti bangkag. Ken siguro, kunkunak iti nakemko, gapu kadagiti yad-adalko kenkuana no kasta nga ibasbasaak iti Bannawag aglalo ti kolum a Padasem Daytoy, Kailian.

Agtukiad ti riknak nga agbakuit idi agtanoy ta segun iti Phivolcs di nalablabes ngem iti maysa metro ti kangato ti dalluyon a mabalin a dumanon iti Pilipinas. Iti panagkitak, kabaelan dagiti pantok a sarapaen. Napayamanak ta di pay nastrek ti panagminas ti baybay ti ilimi ta di ket narpuog koman dagiti pantok a sarikedked kadagiti nadawel a dalluyon.

Ngem napilitanak met laeng nga immannugot iti ipapanmi pay laeng iti Zitanga ta panagbubutos (ispesial nga eleksion para iti kinadiputado) iti kabigatanna. Nakarehistro pay laeng ni baket iti barangayda ket planona nga idiaykami lattan Zitanga nga umian uray ta itulodkonto met laeng koma ida nga agina no bigat.

Idi agrubuatkamin, agsangiten ti ubingmi ta ti kayatna, itugotmi dagiti tarakenna. Ibakimi kano a bitbiten.

Anian, nakunak iti nakemko. Nagpategen ken ni Balong dagiti tarakenna!

Inlawlawagko a dimi maitugot dagitoy ta motor laeng ti luganmi nga agbakuit.

Saanen a nagriri ngem nakalibbi agingga a nakadanonkami it ‘yan da katugangak.

Iti dalan, bumanesbes dagiti lugan a mapan agala kadagiti kabagianda.

Iti Zitanga, awanen ti pakadamagak iti mapaspasamak ta awan ti cable. Antenna laeng. Ngem dadael met ti antenna ti TV da katugangak. Awan met uray radio la koma.

Nagpannurayak lattan iti ite-text dagiti atanudko idiay Pamplona ken Sanchez Mira.

Tineksak ni ading ta sumipngeten ngem awanda met laengen idinto nga imbagak a sumarunodanto lattan no adda makitada a mangimaneho kadakuada (adda ni kayong idiay abroad). Kasta met dagiti nagannak kadakami. Agaabay laeng ti pagtaenganmi.

Agsasaruno dagiti bus nga agbunag kadagiti kailianmi. Kasla agpiestan iti haywey ti kaadu ti tao.

Inubbak ni Jeth idi di latta matimtimek. Awanen ti kinaparagsitna no kasta nga agay-ayam. Nakamuttaleng lattan.

“Apay, Balong?” inamadko.

“Dagidiay manokko, ‘Pang…” inyumbina. “Ni pay Tigre,” ti ukenna nga inted ni lolona ti kayatna a sawen.

Kinatkatawaan da katugangan. “Adda met da lolom a nabati idiay,” kinuna ti katugangak a babai. “Kitkitaenda…”

Ngem di latta a maukas ti pannakaimaymayeng ti ubingmi.

Anian, nakunak manen iti nakemko. Dina latta malipatan dagiti tarakenna.

Nakadalapdapen ti sipnget. Napnon kadagiti nagbakuit ti Brgy. Mabuttal agingga iti Brgy. Guiddam iti kabangibang nga ili. Agarup 5 kilometro ti kaatiddog daytoy naturod a haywey a nagpaingan pay laeng dagiti kailianmi nga awan matuloyanda a kabagianda.

ALAS SIETE ti rabii. Awan pay ni ading ken ti kaanakak. Kasta met dagiti nagannakmi. Awan met sungbatna kadagiti textko kenkuana.

Agalas-otson idi dimtengda a kaduana ti kaanakak (intugotmi ti inaunaan). Dinamagko a dagus da nanang ken tatang.

Dida kano agbakuit.

Nupay kasta, diakon nagsaludsod no apay. Agtalekak ken ni tatang. Maamirisna a nasayaat ti damag. Dina isebba ti bagbagida no makitana a delikado. Nangngegna la ketdi iti radio wenno nabuyana iti TV a saanen a delikado. Wenno awan pay ketdin ti tsunami alert?

Ket agpayso, saan a natuloy ti aluyo. Nakayamanak iti dakkel.

Ket sa laeng met immisem ti ubingmi idi makitanan dagiti tarakenna kadayta a panagawidmi.#