Kasapulan dagiti ad-adu a baro a bannuar

MARAMBAKAN iti tunggal maudi a Lunes ti Agosto iti tinawen kas piesta-opisial a panangilagip iti anibersario ti “Cry of Pugad Lawin” a rugi ti panagrebolusion kontra kadagiti Kastila dagiti Katipunero idi 1896.

Ibilang dagiti Pilipino ti National Heroes Day kas aldaw ti pananglagip ken panangpadayaw kadagiti amin a bannuar iti pagilian a saan a mailaglagip wenno maramrambakan ti aldawda. 

Uray awan ti nayetnag a linteg, dua laeng a Pilipino dagiti nabayagen a mabigbig ken mapadpadayawan a nailian a bannuar ken maibilang a piesta opisial ti aldaw a pannakatay wenno pannakayanakna. Maysa kadakuada ni Dr. Jose Rizal, iti kada Disiembre 30 nga anibersario ti pannakabitayna sadiay Bagumbayan, Manila idi 1896.

Maikadua a nailian a bannuar a mailaglagip ti pannakayanakna ket ti pundador ken Supremo dagiti Katipunero ni Andres Bonifacio, iti kada Nobiembre 30 a pannakaipangayna sadiay Tondo, Manila  idi 1863. Napapatay ni Bonifacio idi Mayo 10, 1897 sadiay Maragondon, Cavite babaen kadagiti rebolusionario a pasurot ni Heneral Emilio Aguinaldo, isu a ti pannakayanakna ti marambakan imbes a ti pannakamartirna.

Iti agdama ken kadagiti naglabas a tawen, mailaglagip metten iti Agosto 21 ti anibersario ti pannakapapatay ni Senador Benigno “Ninoy” Aquino Jr. sadiay Manila International Airport idi 1983. Agingga iti agdama a panawen ket saan pay a natakuatan ti utek ti pannakapapatayna.

Iti kaadu dagiti bannuar a Pilipino ket saan nga umanay dagiti aldaw ken pinanid iti kalendario a mangpadayaw kadakuada. Kalaksidan kadagiti martir ken pimmusayen a bannuar, ket agtultuloy met ti itatanur dagiti baro ken sibibiag a bannuar iti agdama a panawen babaen iti nagduduma a wagas ti panangipakitada ti ayat ken panangisakitda iti padada a tao ken pagilianda.  

Ita nga aldaw ket nasken ti panangbigbig ken panagyaman dagiti umili kadagiti adu a Pilipino saan a mainaganan a bannuar iti bukodda nga aramid ita a panawen a ti Pilipinas ket sumansango iti krisis iti salun-at gapu ti agtultuloy a panagwaras ti Coronavirus 2019. Sumangsango pay ti Pilipinas iti pangta dagiti didigra ti napigsa a ginggined, bagyo ken layus kas ti kaudian a panagdayyeg sadiay Masbate. Sabali pay dagiti nadara a panagraranget dagiti tropa ti gobierno ken dagiti rebelde a komunista, ken dagiti panagbomba ken terorismo kas ti napasamak sadiay Jolo, Sulu.  

Napateg a lagipen ken pagyamanan ti saan a magatadan a sakripisio dagiti frontliners iti panawen ti Covid 19 nangruna dagiti  healthcare workers a mangipuspusta iti biag ken salun-atda tapno mataming ken maagasan dagiti pasiente. Pagyamanan pay dagiti agserserbi kadagiti barangay ken lokal a gobierno ken kadagiti military, polis ken amin nga unipormado nga agserserbi kadagiti nagduduma nga ahensia ti gobierno iti napudno a panangakemda kadagiti annongenda.  Naindaklan met a pagyamanan dagiti agpatpataud ken mangipapaay iti taraon ken dadduma pay a kasapulan a produkto ken serbisio para kadagiti umili.

Nasken ti panangpadayaw kadagiti tumultulong kadagiti marigrigat, biktima iti lockdown gapu iti Covid 19, kalamidad, krimen ken terorismo.  

Mabigbig met dagiti Overseas Filipino Workers a tumultulong kadagiti kapamilia ken kadaraanda iti panawen ti pandemia nangruna iti panangsaranayda kadagiti agkasapulan nga OFW ta adu kadakuada dagiti naawanan iti pagtabahuan ken napagawiden iti pagilian.

Adu pay dagiti saan nga ammo a Pilipino nga agar-aramid iti nasayaat ken kinabannuar iti padada a tao ita a panawen a ti pagilian ket aglaklak-am iti adu a problema kas kadagiti crew dagiti eroplano, barko, bus ken dadduma pay a behikulo a pagluganan dagiti agawid a Pilipino kadagiti bukodda a lugar ken pagtaengan.

Maibilang met a kinabannuar dagiti aramid a mangirakrakurak kadagiti nagduduma a pagteng ken pasamak tapno mapakaammuan dagiti tattao kas kadagiti kameng ti media, ken dagiti mangibutbutaktak ken mangtubtubngar kadagiti kinadakes kas kadagiti whistleblowers dagiti anomalia iti gobierno. 

Nakalkaldaang nga ita a panawen nga agrurutap iti problema ti Pilipinas gapu iti pandemia, natural a didigra, kinadamsak ken terorismo ket adda pay dagiti sindikato ken opisial iti gobierno nga agkurkurimes iti pondo kas kadagiti mapaspasamak iti Philippine Health Corporation. Sabali pay ti grupo a mangidurdruron ti pannakaideklarar ti rebolusonario a gobierno tapno mataginayon dagiti mabenepisiaran nga agturay iti puestoda. Agtultuloy pay ti panangsakup ti China iti paset ti Pilipinas iti West Philippine Sea.

Nadagsen dagiti sangsanguen a problema dagiti Pilipino iti agdama a tiempo, ngem kabaelan a sarangten ken parmeken dagiti umili dagitoy a karit ken pannubok babaen ti panagbalinda a baro a bannuar iti bukodda a wagas ken kabaelan.  Kasapulan dagiti ad-du a Pilipino nga addaan iti awanan-kondision nga ayat iti padana a tao ken situtured nga agtakder iti kinalinteg a mangirupir ti sapasap a pagimbagan. 

Agbibiag ita dagiti Pilipino iti nagpaiduma a tiempo ken kasasaad ti panagbiag ta saan a masinunuo ti pagturongan ti pagilian iti masakbayan. Agtultuloy ti pangta ti pandemia, didigra, riribuk, terorista, anomalia, illegal a droga, krimen, ken pannakasakup iti teritorio ti pagilian, ngem awan-sarday met ti panagsisina ti pammati iti politika ken relihion, ken kinamanagimbubukod iti turay ken kinabaknang.

Kasapulan pay ti ad-adu a bannuar a Pilipino a saan a nasken a matay wenno agarmas tapno makiranget kadagiti kabusor, ngem agtignay para ti sapasap a pagsayaatan dagiti umili ken para ti pagilian. Ita a pannakarambak ti National Heroes Day, sapay koma ta ti lagip ken sakripisio dagiti immun-una ken pimmusayen a bannuar ket agungar iti panunot dagiti opisial ti gobierno ken pribado a tattao tapno makapagkaykaysada a mangparmek kadagiti kangrunaan a kabusor dagiti Pilipino – ti panagsisina ken kinamanagimbubukod.