Kasapulan dagiti servant-leaders nga agserbi iti pagilian – Ex seminarian

SAN JUAN, Ilocos Sur – “Kasapulan dagiti ad-adu a servant-leaders nga agserbi iti pagilian a natubay iti kinasingedda iti Dios ken panagserbida iti Simbaan ken kadagiti umili.” 

Dayta ti impalgak kadagiti kameng ti Ilocos Sur Integrated Press, ni Atty. Cesar Brillantes, alumni ti Immaculate Conception Minor Seminary ken Maryhurst Seminary, iti panagkandidatona a para mayor iti ili a San Juan, kabayatan ti pannakiuman kenkuana. 

Nasalaysay ni Atty. Brillantes a napadakkel isuna nga addaan iti panagraem ken panagbuteng iti Dios kas anak dagiti agassawa a naistrikto a mangisursuro, ken addaan iti padi a kabsat a ni Fr. Edgar Brillantes, naordenan a padi ti Arkidiosesis ti Nueva Segovia ngem agserserbin sadiay Hawaii, USA. Impakaammona a nagadal iti seminario ta tarigagayna idi ti agbalin a padi, ngem sabali ti bokasion a nakaawaganna ta nasapa a naaddaan iti bukod a pamilia. Naileppasna ti Law iti University of the East kabayatan ti panangisursurona iti Philosophy iti kolehio. Naballigi ti propesionna kas private law practisioner ken legal counsel dagiti nagduduma a kompania. Napili pay a kameng ti Sangguniang Bayan iti San Juan.

Impudnona a maikatlon a gundaway a sumango a para mayor iti San Juan. Segun kenkuana, no adda laeng sabali a tumakder a kandidato iti oposision, saanna koman a kayat ti agkandidaton ta masayangan iti bannog, panawen ken nagrigatanna a kuarta a gastosenna. Impudnona nga iti mamitlo a panagipilana iti kandidaturana ket adda latta dagiti nanggandat a nangallukoy kenkuana nga ibabawinan ti panagkandidatona, ngem saanna a nagtallikudan ti prinsipiona gapu laeng iti kuarta, ken kayatna nga ikkan ti pagpilian dagiti botante.

Inlawlawagna nga iti sango dagiti panagdur-as a makitkita iti San Juan ket bassit ti kaibatoganda no madagup dagiti adu a pondo ti lokal a gobierno nangruna ti aggapu iti Republic Act No. 7171 ta maysa kadagiti ili iti Ilocos Sur a kangrunaan nga agmulmula iti tabako a birhinia ken maysa kadagiti kadakkelan ti maaw-awatna a municipal share. Impalgakna nga iti laksid dagiti adu a pondo manipud iti R.A. 7171 ket awan ti mannalon a direkta a bimmaknang iti panagmula iti tabako, ngem gapu ta adu dagiti nakapaadal kadagiti annakda a naaddaan iti nasayaat a pagsapulan ken nakapan nagtrabaho sadiay ballasiw-taaw a gapu ti panagdur-as ti biag dagiti umili.

Inlawlawagna a maysa kadagiti tarigagayna kalaksidan ti pannakaipaay ti nasayaat a serbisio iti salun-at ken edukasion, ken nasayaat a pannakatrato kadagiti ubbing, agtutubo ken nataengan, ket ti napudno a pannakaipakat dagiti amin a pondo ti munisipio kadagiti proyekto ken programa a mangipaay ti naan-anay a tulong ken progreso kadagiti tattao.

“Kasapulan ti pagilian dagiti politiko nga addaan iti puso kas servant-leader a napasnek ken napakumbaba nga agserbi kadagiti tattao,” kinunana iti panangilawlawagna a ti kinakurang dagiti napudno nga agserbi iti gobierno ti lapped ti panagprogreso ti pagilian.

“The weakness of my opponent is my strength,” kinuna ni Atty. Brillantes iti panangaklonna a mayarig ti salisalda iti makasangona iti politika iti dangadang da David ken Goliath.

Inaklonlonna a no ti sistema iti politika ti pagibasaran ket bassit isuna kas ken ni David no maidilig ken ni Goliath a higante a makasalisalna nga addaan iti nabileg a makinaria, ngem no palugodan ti Dios ket agballigi iti panggepna.

Agtaray ni Atty. Brillantes iti Partido ng Demokratikong Pilipinas – Lakas ng Bayan (PDP Laban), kabalubalna ni Vice Mayor Ellaine Sarmiento ti Bileg Party – Hugpong ng Pagbabago.