Komentario: Kasapulan ti natibker a Senado | Tawid News Magazine - Weekly Ilocos News đź“°

Kasapulan ti natibker a Senado

ANIANTO ngata ti pagturongan ti Senado no makapagekemen dagiti nangabak iti kalepleppas a Midterm Elections a dinominar dagiti kandidato ti administrasion? Agtakderto pay ngata ti Senado kas katibkeran a sarikedked a mangsaluad ken mangbalanse ti nasional a gobierno tapno malapdan ti pannakaabuso ti turay wenno sumursurotto lattan dagiti senador iti diktar ti agdama nga administrasion?

No man pay adun dagiti kandidato iti oposision ti nangaklon ti pannakapaay ti kandidaturada, narigat a maawat dagiti adu a nangibotos kadakuada ti resulta ti kalkalpas nga eleksion, ti naan-anay a panagballigi dagiti kandidato ti administrasion.

Narigatda a maawat ti pannakaabak dagiti sinuportaranda a natakneng ken makabael a kandidato a para senador. Maldaanganda a kaaduan pay laeng kadagiti botante a Pilipino ket kinaykayatda nga imbotos dagiti kandidato a mapagduduaan ti integridad ken kualipikasionda nga agserbi iti Senado a kangatuan a pagaramidan iti linteg ti pagilian para ti sapasap a pagsayaatan dagiti umili. Malidayanda ta kinaykayat dagiti kaaduan a botante nga intandudo dagiti kandidato a addaan iti kaso mainaig iti kurapsion, artista, bulbullagaw ken awan ti naindaklan a naaramidanda para ti sapasapa pagsayaatan dagiti Pilipino.

Narigatda a maaklon dagiti supporters ti oposision ti nagbanagan dagiti kandidato a binutosanda a namnamaenda a mangsaluad ti “check and balance” ti administrasion ni Presidente Rodrigo Duterte nga iti panagakemton dagiti kabarbaro a senador ket napairut pay ti pannakatengngel kadagiti tallo a sanga ti gobierno – Ehekutibo, Legislatura ken Hudikatura.

Agamak dagiti adda iti oposision a ti panangdominar dagiti maka-administrasion iti Senado ket nasaysayudton ti pannagna dagiti gannuat ken tarigagay ni Presidente Duterte nga iwayat iti las-ud dagiti maudi a tallo a tawen ti terminona.

Iti panangdominarton dagiti senador a kaaliado ti administrasion, nasaysayudton nga amang ti panagtaray ti gannuat a pannaka-amendar ti 1986 Constitution tapno mawayaan ti pannakasukat ti agdama a “Unilateral System” babaen ti “Federal System of Government” nga idurduron ti Presidente. Naannayasto la ketdi ti pannakaaprobar dagiti linteg a mangisubli ti “Death Penalty” wenno dusa a patay kadagiti makaaramid iti nadagsen ken nakaam-ames a krimen, ken pannakaibaba ti tawen dagiti ubbing a maaddaan iti “criminal liability” a makaaramid iti panaglabsing iti linteg.

Mabalin nga agabantenton ti gakat para ti maikadua a bersion ti Tax Reform for Acceleration and Inclusion Law a nangpadagsen ti kasasaad dagiti Pilipino gapu iti naipangato a buis dagiti kangrunaan a magatgatang agraman dagiti power and petroleum products a nangparnuay kadagiti agsisipul nga epekto ti ingingina ti presio dagiti dadduma pay a produkto ken serbisio.

Pagam-amkan met dagiti adda iti oposision ti nasayud a pannakaaprobar ken saan a naan-anay a pannakarepaso dagiti adu nga internasional a katulagan a serkan ti agdama nga administasion nangruna iti pagilian a China a mabalin a mangirarem ti Pilipinas iti utang nga ad-addanto pay a mangpadagsen ti biag dagiti umili iti masungad a henerasion.

Nasken ti panangrepaso ti Senado kadagiti amin a bilateral agreements a serserken ti agdama nga administrasion ta amangan a dagiti katulagan wenno adu nga utang ti gobierno iti China a pangpondo iti Build, Build, Build Program ti administrasion ket saan a mapupuotan a maikalin ti Pilipinas iti utang a mabalin a pakapukawan ti naan-anay ken kontrol ti soberenidad iti panagtagikua kadagiti teritorio ti Pilipinas iti West Philippine Sea nga inkeddengen ti International Tribunal a kukua ti pagilian, ken illegal ken awanan iti pagbasaran ti 9 Dash Line Claim ti China a mangtagtagikua iti kalawaan a paset ti South China Sea. 

Iti agdama a bassit a bilang dagiti adda iti oposision iti Senado, marigatanda la ketdi a mangirupir iti pagtaktakderanda kadagiti isyu ken nagduduma a pakaseknan dagiti umili. Mangnamnama met dagiti supporters ti oposision nga agtalinaed a natibker iti prinsipio dagiti nabati a naikappeng iti Liberal Party a da Senador Franklin Drilon, Kiko Pangilinan, Riza Hontiveros ken Leila De Lima, ken agtultuloy ti naregta a panangtubngarda kadagiti gannuat ken gakat a mangisagmak kadagiti umili.

Mangnamnama pay dagiti supporters ti oposision nga uray pay bassit ti bilang dagiti nabati a senador a kontra iti administrasion ket dagiti dadduma a kaaliado ti agdama a turay ket agtakderda iti kinalinteg ken irupirda ti sapasap a pagsayaatan dagiti Pilipino. Patienda nga adda dagiti senador nga uray kaaliado ida ti administrasion ket adda latta rissik iti kaungganda a kumanunong iti pagimbagan dagiti kaaduan nga umili.       

Iti pakabuklan ti Senado iti agdama ket ibagian dagiti kameng nga independiente ken naikappeng kadagiti nagduduma a partido kas ti Nationalist People’s Alliance a partido ni Senate President Vicente Sotto III; Partido Demokatiko Pilipino – Lakas ng Bayan (PDP Laban) a partido ni Presidente Duterte; Nacionalista Party ni Sen. Cynthia Villar; Liberal Party, United Nationalist Alliance ni Sen. Nancy Binay; ken Partido ng Masang Pilipino ni Sen. JV Ejercito.

Mangnamnama dagiti adu nga umili nga uray kaaliado ti Presidente da Senate President Sotto, Senate President Pro Tempore Ralf Recto, Sen. Panfilo Lacson ken dadduma pay a senador a nabutosan idi 2016 ket agbalinda a critical-collaborator ti administrasion a mangilaban ti pagsayaatan ti kaaduan ta ti kaaddada iti Senado ket saan a gapu nga imkampania wenno inyendorso ida ti Presidente. Bigbigenda ketdi nga utangda ti saadda kadagiti umili a nangibotos kadakuada ket rebbengna a supapakanda dayta babaen ti nawaya ken napudno a panagserbida iti pagilian babaen ti natibker a panangannongda kadagiti akemda a mangsaluad ti “check and balance” iti gobierno ti Pilipinas.