KASAPULAN TI METRO VIGAN COORDINATING COUNCIL

Salaysay ni Eden A. Alviar

 

KASAPULAN ti nasinged ken aktibo a Metro Vigan Coordinating Council tapno masolbar dagiti nagduduma a parikut ti Vigan City ken dagiti kabangibangna nga ili iti Ilocos Sur.

Daytoy ti impaganetget ni Vigan City Mayor Juan Carlo S. Medina iti pannakiumanna kadagiti kameng ti media kalpasan ti umuna a 100 nga aldawna kas Chief Executive ti napnuan-pakasaritaan a siudad.

Impakaammo ti Mayor nga iti las-ud ti umuna a 100 nga aldaw ti administrasionna ket nakita ken ibirbirokanna ti solusion dagiti adu a parikut ti siudad nangruna iti pakaseknan ti turismo, solid waste management, trapiko ken panagdappat iti daga ti gobierno. Inaklonna a nadagsen dagitoy a problema ket narigat a solbaren no saan a makitimpuyog dagiti kabangibang nga ili. Ingunamgunamna ti panagtitinnulong koma dagiti maseknan a local government units tapno masolbar dagiti problema iti masungad a panawen.

Immadu ti bilang dagiti turista iti Vigan City kalpasan a nabigbig kas World Heritage Site babaen ti United Nations Educational, Scientific and Cultural Organization. Ad-adda pay nga immadu dagiti turista kalpasan a nairaman a maysa kadagiti New 7 Wonder Cities of the World idi Disiembre 2014.

Manipud idi Enero 2015, inaldawen dagiti bisita ken turista nga agpasiar iti siudad nangruna iti Heritage Village iti Calle Crisologo ken dadduma pay a nalatak a tourist attractions. Agsasaruno met dagiti naan-angay a kombension ken panagtataripnong dagiti agserserbi iti gobierno ken pribado a sektor.

Gapu ti yaadu dagiti sangaili ken turista, immadu met dagiti nabangon a hotel, inns, transient houses ken dadduma pay a negosio a mangipaay ti serbisio kadagiti bisita. Nagangayanna, immadu dagiti inaldaw a makolekta a basura kadagiti nagduduma a pasilidad ken pasdek iti siudad. Kimmaro pay ti problema ti trapiko gapu ti kaadu dagiti lugan ken kailet dagiti daanen a kalsada.

Uray kadagiti kabangibang nga ili, immadu met dagiti nabangon a pasilidad a pagpasiaran ken pakapasangbayan dagiti turista. Maysa kadagiti masansan a sarsarungkaran dagiti turista ken religious pilgrims ket dagiti simbaan ken maibilang a narelihiosuan a lugar iti Ilocos Sur. Mabigbig ti Vigan City a puseg a nagsaadan ti Arkidiosesis ti Nueva Segovia a sigud a sentro ken nagramutan ti Katoliko a Pammati iti intero nga Amianan a Luzon.

Tapno masolusionan dagiti problema, ikagkagumaan ti administrasion ti siudad ti nainget a pannaka-regulate dagiti maipatakder a pasdek ti negosio. Nayusuat ti nasamay a solid waste management babaen ti kaadda dagiti material recovery facilites ken natalged a sanitary land fill. Ngem nagbalin a problema ti panagibelleng iti basura iti las-ud ti siudad dagiti agindeg kadagiti kaparanget nga ili iti rabii. Isu nga addan dagiti nadutokan nga agbantay ken agtiliw kadagiti agibelbelleng ti basura iti siudad a saan a taga-Vigan.

Nadagsen pay a problema ti trapiko ken pagparadaan wenno parkingan, ngem kaaduan kadagiti lugan ket saan a kukua dagiti taga-Vigan. Tapno mapalag-anan ti parikut ti parkingan, narugianen ti pannakabangon ti multi-level parking building iti sentro ti siudad iti Quezon Avenue. Napainget pay ti pannaka-regulate dagiti traysikel nga agpaspasada iti siudad manipud kadagiti kabangibang nga ili.

Parikut pay ti kapuskol dagiti water lily kadagiti karayan iti siudad a kasilpo dagiti adda iti kabangibangna nga ili a no saanda a madalusan ket sabbenanna ti ayus ti danum a mabalin a makaigapu iti layus no panawen ti napigsa a tudo. Problema pay ti kaadda dagiti informal settlers a nagpatakder kadagiti balayda iti igid ti Govantes River iti nagbeddengan ti Vigan ken Bantay iti sungadan ti siudad a mangdadael ti imahe ti Heritage City.  Ikagumaan ti City Government ti agtultuloy a pannakayakar dagiti informal settlers iti masakupan ti Vigan iti housing project iti relocation site nga impataker ti lokal a gobierno.

Iti idudur-as ti industria ti turismo, nasken pay a mapatalgedan ti seguridad dagiti bisita ken turista tapno malapdan ti pannakapasamak dagiti nagduduma a krimen nangruna ti terorismo. Nasken pay ti nasayaat a pannakamantiner dagiti kadaanan a balay, pasdek ken kalsada a nagbalinen nga atraksion ti siudad.

Para ti agtultuloy a pannakapadur-as ti turismo ken komersio, kasapulan pay ti pannakapataud dagiti nayon a pasilidad ken atraksion kas kadagiti dadakkel a shopping malls tapno adda paggatangan dagiti turista ket saandan a mapan iti kabangibang a probinsia. Nasken pay ti pannakapadur-as ti eropuerto iti siudad tapno makadisso ken makatayab dagiti dadakkel ken komersial nga eroplano ket mapadaras ti panagbiahe dagiti umay iti Ilocos Sur.

Inaklon ti Mayor a naileten ti sentro ti siudad ket awanen ti nasayaat a pakaipatakderan dagiti dadakkel a shopping malls wenno nalawa nga eropuerto. Impalgakna a kayatna latta a mabangon dagitoy nga establisimiento iti uneg ti siudad, ngem nasaysayaat no mabangonda kadagiti kabangibangna nga ili a nalawlawa ti espasioda tapno nasaysayaat ti pakaipatakderanda ken ad-adu dagiti mabenepisiaran nga umili.

Kakibin ti panagdur-as ti Vigan City ti panagprogreso met dagiti kabangibangna nga ili, ngem nagtalinaed ti siudad a sentro ti turismo ken negosio. Nagtalinaed pay ti siudad a sentro ti probinsial a gobierno ken ayan dagiti kaaduan nga opisina dagiti nagduduma nga ahensia ti nasional a gobierno. Nagtalinaed pay ti siudad a sentro ti Katoliko a Pammati iti Nueva Segovia.

Tapno mapagtalinaed ken mapasayaat pay ti kasasaad ti Vigan City ken dagiti kabangibangna nga ili, nasken ti panagtitimpuyog dagiti amin nga agkakaarruba nga LGU, ken makapagtitinnulongda a mangsango kadagiti problema para ti sapasap a pagimbagan. Nasken ti Metro Vigan Coordinating Council tapno naannayas ti pannakaiwayat dagiti gannuat ken programa a mangapektar ti biag dagiti umili.

Iti naglabas a panawen, addan nayusuat a gannuat para ti pannakabukel ti MVCC. Adda pay idi plano ni sigud a Vice Governor Deogracias Victor Savellano (Congressman itan) idi 2004 para ti pannakabukel ti Metro Vigan Authority iti salinong ti Provincial Government a buklen ti Vigan City, Caoayan, Santa Catalina, San Vicente, Santa, Bantay, San Ildefonso ken Santo Domingo. Ngem saan a nagballigi dagita a gannuat.

Napintas ti sirmata ni Mayor Medina para ti MVCC ket tapno magun-od ti tarigagayna, nasken ti suporta dagiti mayor ken agindeg kadagiti kabangibang nga ili.  Nasayaat daytoy a pakainawan ti Metro Vigan Development Authority kas ti Metro Manila Development Authority nga addaan bukod a charter ken pondo a mangmanehar kadagiti napateg a pakaseknan ti panagbiag dagiti umili.#