Footer

Kasapulan ti nalawag a resulta ti inbestigasion

ITAY OKTUBRE 19, iti agarup 1:30 iti malem, maysa a napigsa nga explosion ti nangdayyeg iti Glorieta 2 shopping complex iti Makati City ket insualitna dagiti diding, rinebbana dagiti bobeda ken inggamporna dagiti naburak a kongkreto kadagiti tattao nga adda iti uneg ti shopping mall ken kadagiti sasakayan iti ruar.

Iti kaudian a report, addan 11 a natay idinto a ginasut dagiti nasugatan a naitaray kadagiti nadumaduma nga ospital iti Makati.

Saan a maigawid ti turay dagiti agsasallupang nga  alegasion mainaig iti panagbomba iti shopping complex.

Kuna dagiti opisial ti polis nga aramid ti terorista ti panagbomba. Dida met imbaga no ania a grupo ti nangisayangkat.

Kuna ti maysa nga opisial ti seguridad nga urban terrorists a naikappeng iti Abu Sayyaf ti nangisayangkat iti panagbomba kas paset iti planoda a mangriribuk kadagiti siudad.

Kinuna ti maysa a nangato nga opisial iti gunglo dagiti negosiante nga aramid daytoy dagiti extremist groups tapno gundawayanda ti agdama a riribuk iti politika iti pagilian.

Maysa met a lokal a turayen ti siudad ti nagkuna a kasapulan ti nainget nga inbestigasion iti napasamak tapno “maikkat dagiti ispekulasion iti posible a pannakainaig ti panagbomba iti agdama a politikal a mapaspasamak.”

“Agpaparang a terrorist attack,” kuna met ti Sekretario ti Depensa.

Iti sabali a bangir, pinaglibakan da AFP Chief  Director General Hermogenes Esperon ken National Security Adviser Norberto Gonzales ti akusasion ni nakapupok a nabutosan a Senador Trillanes nga isuda ti nagiwayat iti panagbombakas “sabali a taktika ti administrasion tapno maiyadayo ti imatang ti publiko kadagiti kontrobersia a mangsursurot ken ni Pres. Arroyo.”

Uray ania dagiti alegasion, maymaysa ti rupa ti napasamak: kinadamsak.

Saan a kinailalaan dagiti nangisayangkat iti panagbomba dagiti naipatli a biag. Kadakuada, napatpateg ti panangiduronda iti dakes a panggep ken planoda uray asino ti masalsalapon. Kinaranggas daytoy a saan a maawat iti nademokrasia a kagimongan.

Iti daytoy a pasamak, saan a rumbeng ti panagtitinnudo ken panagpipinnabasol. Kasapulan ti panagtitinnulong amin tapno madagdagus a maitudo dagiti nagisayangkat iti panagbomba, iti kasta, maisaklang ken mausigda iti korte nga agtungpal iti pannakaikursongda   iti pagbaludan tapno ikaroda ti nagbasolanda.

Agingga iti awan  paglawagan ti napasamak, sumngayto ti amak ken ngatangata iti kaunggan dagiti umili no kabaelan ti turay ken ti kapolisan a salakniban ida kadagitoy kakastoy a tattao nga awan ti panangilalada iti biag.

Iti daytoy a situasion, kasapulan ti nalawag ken awan panagduadua a resulta ti inbestigasion.#