Editorial: Kasasaad ti salun-at ti Presidente | Tawid News Magazine - Weekly Ilocos News 📰

Kasasaad ti salun-at ti Presidente

ANIA a talaga ti kasasaad ti salun-at ni Presidente Rodrigo Duterte? Mabaelanna pay ngata nga epektibo nga agserbi kas Pangulo ti Pilipinas kadagiti nasurok a dua a tawen a nabatbati pay iti terminona?

Dagitoy a saludsod ti mangparnuay iti amak ken panagdudua dagiti umili gapu kadagiti agsasaruno a damag maipapan iti kasasaad ti salun-at ni Presidente Rodrigo Duterte kalpasan a natumba iti panagsakayna iti motorsiklo ken nagdardaras a nagawid iti Pilipinas kabayatan ti ipapanna sadiay Japan para ti pannakaisaad ti baro nga emperador iti dayta a pagilian.

Immunan a pinasingkedan ni Senador Christopher “Bong” Go ken Presidential Spokesman Salvador Panelo a nasalun-at ti Presidente ken kasapulanna laeng iti naan-anay nga inana gapu iti nakaro a pannakakumikomna iti trabahona. Ngem iti laksid ti pammasingked dagiti dua nga opisial a nasinged iti Presidente, saan a mapunas ti panagamak ken panagdudua dagiti umili.

Nagsaritan a mismo ni Presidente Duterte iti media ket pinasingkedanna a nasayaat ti salun-atna iti laksid dagiti sugat a linak-amna iti pannakaaksidentena iti motorsiklo. Immunan nga inaklonna dagiti dadduma pay a sagsagabaenna a sakit, ngem impatalgedna a napigsa ken kabaelanna nga epektibo nga akmen dagiti responsibilidadna.

Sakbay ti pannakatumba iti motorsiklo ti Presidente, kabayatan ti panagsaritana iti ibibisitana sadiay Russia, inaklonna nga addaan isuna iti naidumduma a sakit a saanna a malapdan a mamagkirem ken mangpabassit ti maysa a matana. Impalgakna nga agsagsagaba iti auto immune chronic neuromuscular disorder.

Agsagsagaba ti Presidente iti localized ocular myasthenia, sakit a mangpataud ti panagkapsut dagiti masel, ken awan pay iti natakuatan nga agasna kalaksidan iti kaaddan ti medisina a manglapped kadagiti sintomana.

Kalaksidan iti dayta a sakit ti Presidente, immunan a nairakurak iti publiko dagiti dadduma a sakitna – migraine gapu iti pannakadangran dagiti uratna kalpasan ti nabayagen a pannakaaksidentena iti motorsiklo. Agsagsagaba pay iti Barret’s oesophagus a mangapektar iti karabukobna. Addaan pay isuna iti Buerger’s disease a naalana gapu iti nakaro a panagsigariliona idi agkabannuag.

Nagduduma a pattapatta dagiti umili maipapan iti kasasaad ti salun-at ti Presidente ta normalen ti panagrakaya wenno panagkapsut ti bagi ti maysa a tao nga agtawen iti nasurok a 70 nangruna no adu dagiti pakakumikoman ken pampanunotenna.

Maibilang ni Presidente Duterte a kalakayan wenno kataengan a nabutosan a Pangulo ti Pilipinas kalpasan ti Maikadua a Gubat iti Lubong. Uray isuna ti kataengan kadagiti nagkandidato idi 2016 ket isu ti insaad iti turay dagiti umili. Iti laksid dagiti adu a naub-ubing a kandidato idi 2016 ket intarayanna iti butos dagiti amin a nakabalubalna.

Saanen a nakaskasdaaw a rumsua dagiti nagduduma a parikut iti salun-at iti tawen ti Presidente a 74 ken kaadu dagiti trabaho ken responsibilidadna a mangsango kadagiti nagadu a nadagsen a problema iti Pilipinas manipud idi nagakem a Presidente idi 2016.

Iti las-ud ti nasurok a tallo a tawen a kaadda ni Presidente Duterte iti turay, saan a nagpatingga dagiti adu a problema ken eskandalo iti administrasionna a mangpataud iti adu nga stress ken pannakabannog ti Presidente nangruna ti pannakainaig kadagiti kontrobersia ken eskandalo dagiti nasinged kenkuana.

Manipud idi nagakem idi Hulio 1, 2016, nagbalin a nakaro a kontrobersia ti kampania ti gobierno kontra illegal a droga ken dadduma pay a krimen. Rinibu a biag dagiti nakettel iti gerra kontra illegal a droga a gapu ti panangkondenar dagiti human rights advocates iti Presidente ken pannakaidarumna sadiay International Criminal Court. Saan a nagsarday dagiti kritisismo manipud kadagiti kontra ken kritiko ti administrasionna nangruna iti pannakalasbing ti human rights.

Saan a nagpaut ti ceasefire iti nagbaetan ti gobierno ken dagiti rebelde a New People’s Army – Communist Party of the Philippines. Naraut ken nasakup ti Marawi City babaen kadagiti terorista a kameng ti Abu Sayyaf Group ken Maute Group a naikappeng iti Islamic State of Iraq and Syria. Agtultuloy iti terorismo kadagiti dadduma a lugar iti Mindanao iti laksid a nakadeklarar ti Martial Law. Agtultuloy met ti pangta ken panangsakup ti China iti teritorio ti Pilipinas iti West Philippine Sea.

Awan-sarday dagiti nadagsen a problema iti Pilipinas agingga ita 2019. Iti daytoy naudi a kagudua ti tawen, agsasaruno nga isyu dagiti mangdaydayyeg ti administrasion – problema iti illegal a droga, kurapsion iti gobierno, panangsakup ti China iti paset ti West Philippine Sea, ninja cops wenno dagiti police scalawags, eskandalo iti implementasion ti Good Conduct Time Allowance iti Bureau of Corrections, krisis ti transportasion ken danum sadiay Metro Manila, nalaka a presio ti irik ken nangina a bagas, panagraira ti African Swine Fever a nangapektar ti industria ti panagtaraken ti baboy, natural a kalamidad kas dagiti napigsa a ginggined ken layus, ken dadduma pay a problema.

Iti laksid dagitoy a nagadu a kontrobersia ken problema iti Pilipinas, agtultuloy ti nangato nga approval rating ti Presidente kas maibasar kadagiti surbey iti naglabas. Ngem gapu kadagiti maipadpadamag a kasasaad ti salun-at ti Presidente, umad-adu dagiti agdudua no kabaelanna pay a tungpalen dagiti karina ken no maleppasna a sikakaradkad ti terminona.

Naipalaon iti 1987 Constitution a kalintegan dagiti umili a maamuan ti kasasaad ti salun-at ti Presidente aglalo no nakaro ken makaapekto iti panangannongna kadagiti responsibilidadna kas kangatuan nga opisial ti pagilian.