Kasla Taba a Sumaretset!

Salaysay ni Rilo A. Bedo

 

NABARA nga isyo ita daytoy namunganay iti ikub ti Kamara ken Senado. Sukisokenna amin a suli ti pagtaengan. Awan labsanna nga aprosan iti dagaang. No street foods, sumarsaretset dagiti taba iti beggang ket mapasul-oy amin a makaangot iti asukna.

Ngem ania ngamin, aya, daytoy ta kasta laengen ti panangdayyegna iti sibubukel a pagilian? No taraon koma, di kad’ pagragsakantayo nga umili tapno mairamantayo met. Ti yanna nga adat, saan met.

Priority Development Assistance Funds, dayta ti awagda iti Inglis kadaytoy a luto. Ngem ad-adda nga am-ammo a kas pork barrel. Daytoy ti pondo dagiti lidertayo (kangrunaan dagiti senador ken kongresista) tapno itulongda kadatayo nga umili.

Wen, isu daytoy ti pangalaan dagitoy a lidertayo iti pagpatakder/pangmantinerda kadagiti pagadalan, rangtay ken kalsadatayo;  maigatang iti agas kadagiti pampubliko nga ospital; pangpondo kadagiti imbunongda a PhilHealth card; para iti programada nga scholarship,  ken sindadaan nga itulongda kadagiti mapan umararaw a constituentda wenno kakaduada a lider iti ab-ababa nga agpang.

Ay, narigat man met a dida patgan dagitoy ta saandanton a namnamaen ti tulongda inton dumteng manen ti basingkawel.

Napintas dagiti rason no apay a napaadda daytoy a PDAF dagiti lidertayo. Ngem ti pagdaksanna, rumrumsua ita a ramut ti korapsion wenno kunniber daytoy. Imbes a maisaranay kadagiti marigrigat wenno mangitag-ay iti kasasaadtayo nga umili, pagiinnunaan dagiti “nangisit ti kararuana” a pagnumaran.

Agasem dayta P10B pork barrel scam a nabulgar? Mano daytan a kuarta a napukaw/nagpukaw lattan? Napananna ngay?

Iti report, adda kano met nakailatanganda dagitoy a mapukpukaw a pondo (a nagtaud met laeng iti buistayo nga umili). Pagdaksanna, “al-alia” dagita a proyekto. Kayatna a sawen, nagpatinggada laeng iti papel. Saanda a dimmanon iti talaga a nakaisangratanda. Wenno mabalin a dayta nga organisasion a kampay idi ket nakaitedan iti tulong ket maysa met nga “al-alia.” Di kad’ inal-alian ti pagilian?

Daytoyen ‘tay kunkunada a money is the root of all evil. Basta kuarta ti saritaan, adda latta dayta pannakapukaw/pannakatawtawna aglalo no maibaut iti maysa a proyekto. Pagilgatan met dagiti dadduma. Nasayaat no ilgat laeng. Ngem no ngay kammetenda?

Wen, napigsa ti gutad ti kuarta! Rippuogenna ti inan-annadan a kinatao!

Ngem kas namnamaen, nagalang-ang dagiti nainaganan iti nasao nga iskam. Nagsapan a politika, adda nagkuna. Maysa ngamin kadagitoy ti naaweng ti naganna a para Presidente iti Eleksion 2016.

Nakasaganaak a maimbestiga, kuna pay ti maysa. Dina kano am-ammo dayta whistleblower a nagtaudan daytoy a karasakas iti sibubukel a pagilian.

Mayataday iti ibagbaga ti linteg ti pannakagasto ti PDAF-ko, sabali laeng ti nagkuna. Nasapa daytoy a demolition job kadagiti lider a yan ti suporta ita ti tao.

Ayna, santayon a masdaaw kadagiti kastoy a damag. Nalaka kad’ ti mangaklon lattan iti maipabpabasol kenkuana? Uray payen agdadata ti panagbasol, kas koma iti panagkusit iti klase, dinto latta aminen ni agtutubo a nagkopia. Irasonanna ti bagbagina agingga iti adda ipalapalna.

Ngem maraem man ditoy dagiti dadduma ta sipapakumbabada (panaginkukuna?) a nagkuna a sidadaanda nga agdalan iti imbestigasion. Ngem masapul a buklen dagiti independent body ti grupo dagiti imbestigador tapno awan ti makunkuna a bias.

Sakbayna ketdi, immingar ti pangulo dagitoy a lidertayo. No agpayso ti isyo, inaganan koma dagiti taga-NBI (National Bureau of Investigation) dagiti karaman itoy nga iskam tapno di  madadael ti imahen ti grupoda. Iti kasta, dida agbalin amin a suspek.

Iti nagan ti delikadesa, ag-leave koma pay laeng dagiti karaman itoy nga iskam, kinuna ni Sen. Miriam Defensor Santiago.

(Adda tuloyna)