Kaso ti biktima kitkitaen inbestigador a motibo pammapatay

NARVACAN, Ilocos Sur – Kitkitaen dagiti inbestigador ti anggulo nga adda pakainaigan ti kaso a sangsanguen ti biktima iti pannakapapatayna iti mismo a pagtaenganna sadiay Barangay Casilagan ditoy nga ili idi rabii ti Agosto 7.

Kuna ti Narvacan police nga akusado ni Benjamin Cabcaban y Bao-ay, 54, naasawaan, iti attempted homicide ken adda ririda iti daga iti kaarrubana, ket daytoy ti anggulo a kitkitaenda iti panagimbestigada iti motibo ti pammapatay.

Iti inisial a panagimbestiga dagiti polis, agtugtugaw ni Cabcaban iti abay ti tawa ti kusinada idi inasitgan ti maysa nga armado a tao ket pinaltoganna iti sumagmamano a daras ti biktima.

Nagsagrap ti biktima kadagiti sugat iti ulo ken abagana a puon ti nakatayanna.

Segun ken ni Priscila, asawa ti biktima, adda iti uneg ti kuartoda idi nakangeg iti nagsasaruno a kanalbuong ket idi nagpakusina, nakitana laengen ti asawana a nakadalutaytay iti suelo nga agdardara gapu kadagiti sugatna.

Awan ti nasarakan dagiti inbestigador a kapsula wenno buli iti nakapasamakan ti crime scene.

Kinuna ti polis a nasulinek ken kabambantayanen ti Barangay Casilagan ket 45 minutos ti panagdaliasat agingga iti nasao a lugar.

Innayonda a naiputputong ti balay ti biktima ket adda laeng uppat a kaarrubada a balay.

Kabayatanna, awan pay suspek ti kapolisan iti pannakapapatay ti kagawad ti Barangay Pinipin ditoy nga ili idi agsapa ti Agosto 4.

Kanaig daytoy, maysa a case conference ti nagtipon nga insayangkat da Chief Inspector Simon Damolkis, hepe ti polis ti Sta. Cruz, ken ni Chief Inspector Modesto Carrera, team leader ti CIDT, Ilocos Sur ken dagiti bukodda nga inbestigador ket nagpatanganda dagiti nakalapda nga impormasion para iti pannakabigbig ti gunmen ken pannakaipila ti umisu a kaso.

Napapatay ni Antonio Cudiamat y Cabalbag, 42, kagawad ti Barangay Pinipin bayat ti panagdaliasat ti traysikelna iti kalsada a sakup ti Barangay Suyo idi agarup alas 6:40 ti agsapa ti Agosto 4.

Segun iti polis, bayat ti panagtaray ti traysikel a minaneho ti kagawad, mapapati nga inabay dagiti di nabigbig a suspek a naglugan iti Honda Wave motorcycle ket pinaltoganda ti biktima iti sumagmamano a daras a nagresulta iti pannakatayna a dagus.

Naglibas dagiti suspek a nagturong iti amianan a daya a direksion.

Nakarekobre dagiti inbestigador iti uppat a kapsula ken maysa a deformed slug a nagtaud iti cal. 45 iti crime scene.

Di pay ammo ti motibo ti pammatay.#