Kaso ti dengue iti Ilocos Sur, bimmassit

VIGAN CITY – Iti sanguanan ti panagballaag ti Departa-mento ti Salun-at ti panagpangato manen dagiti kaso ti dengue iti pagilian, inreport ti Department of Health ditoy probinsia ti ibabassit ti bilang dagiti kaso daytoy a sakit.

Segun iti maysa a report manipud iti National Epidemiology Center, addan nasurok a 42,207 a kaso ti dengue iti pagilian manipud Enero daytoy a tawen agingga iti umuna a lawas ti Hunio.

Maysa laeng a porsiente ti bimmabaanna iti nairekord a kaso ti dengue iti daytoy met laeng a tiempo idi napan a tawen.

Ngem iti report manipud iti DOH ditoy, bumabbaba ti kaso ti dengue iti probinsia.

Segun iti DOH ditoy, adda  laeng 87 a nairekord a kaso ti dengue iti probinsia manipud idi Enero 2013 agingga iti umuna a lawas ti Hunio daytoy met laeng a tawen.

Dagiti sumaganad dagiti naireport a kaso ti dengue iti probinsia: Enero – 18 cases; Febrero 8; Marso – 20; Abril 22; Mayo 0 15; ken agingga iti Hunio 20 – 3.

Kinuna ti DOH a bimmaba ti bilang dagiti kaso ti dengue ditoy maigapu iti agtultuloy a nainget a kampania ti panagdaldalus kadagiti parparaangan ken iti pannakaisayangkat ti Operation Pattog no sadino a naigunamgunam ti pannakaipattog amin dagiti danum a linaon dagiti ramit, gamit ken nadumaduma a banag iti arubayan a pagbalayan ken pagitlogan dagiti lamok.#