Footer

Kaso ti dengue, umaboten iti 309: datus manipud PHO

VIGAN CITY – Umaboten iti nasurok tallo gasut ti kaso ti dengue iti Ilocos Sur, segun iti kaudian a datus nga imparuar ti Provincial Health Office.

Impakaammo ni SPM Jerry Singson, chairman ti committee on health and sanitation, bayat ti session ti hunta probinsial idi Agosto 17 nga umaboten iti 309 ti kaso ti dengue iti Ilocos Sur kas maibatay iti datus manipud iti Provincial Health Office.

Segun ken ni Singson, manipud Enero agingga iti Hulio daytoy a tawen, immabot iti 203 ti kaso ti nadakamat a sakit, ket sangapulo kadagitoy ti natay.

Ngem kinuna ti bokal nga iti umuna a sangapulo ket lima nga aldaw ti Agosto, adda nainayon a 106 a kaso ti dengue nupay awan ti nainayon a natay.

Dagiti sumaganad dagiti naireport a kaso ti dengue iti probinsia manipud idi Enero agingga iti Hulio:  Sinait – 29, Sta. Cruz – 28 ken Candon City – 22.

Iti Agosto,  nanayonan iti maysa ti kaso ti dengue iti Sinait, 8 iti Sta. Cruz ken 9 iti Candon City.

Kinuna ni Singson a ti ili ti Cabugao ti ad-adda a sipsiputanda ta nupay 3 laeng ti kaso iti nasao a lugar manipud Enero agingga iti Hulio, timmayok ti bilang dagiti apektado iti 29 iti kagudua laeng ti Agosto.

Kanaig daytoy, dagus a minandar ni Vice Governor Deogracias Victor Savellano  ni Singson a pakaammuanna dagiti mangimatmaton iti Provincial Health Office tapno dumatagda iti hunta probinsial iti sumaruno a session tapno ammuenda dagiti programa ti PHO mainaig iti pannakapugipog ti nasao a problema ken no sadino a makagkagat iti lamok dagiti biktima.

“No maammuantayo nga iti pagadalan ti kaaduan a pakakagkagatanda, paayabantayo met a dagus dagiti agtuturay ti DEpEd tapno makitinnulongda a mangdadael iti pagbalbalayan dagiti lamok,” kinuna ti presiding officer.

Inyunay-unay ni Singson a ti pay laeng operation pattog ti kasamayan a pangprebentar iti panagadu ti lamok.

“Masapul a maipattog dagiti bote, lata ken dadduma a pay a pakaur-urnongan ti danum a pagitlogan ti lamok. Laglagipentayo a nasamsamay ti panagprebentar ngem iti panangagas,” inyunay-unay ni Singson.#

, ,