Footer

Kaso ti dengue, umad-adu iti I. Sur

BANTAY, Ilocos Sur – Iti umuna a pito a bulan iti daytoy a tawen, duan ti natay idinto a nasuroken a 160 dagiti masuspetsa a kaso ti dengue, segun iti provincial health team office ditoy probinsia.

Kinuna ni Rogelio Varilla, operation officer ti dengue iti Provincial Health Team Office ti probinsia ti Ilocos Sur bayat ti interview kenkuana ti DZTP Radio Tirad Pass ken Tawid News a maibasar iti rekord nga agpatingga iti Agosto 8 daytoy a tawen, duan ti natay gapu iti dengue.

“Maysa ti natay a taga-Sinait, idi bulan idi Enero ken ti maysa a taga-San Juan, Ilocos Sur ti natay idi bulan ti Hunio,” kinuna ni Varilla sana innayon nga agdagupen iti 168 dagiti masuspetsa a nagsakit iti dengue iti probinsia.

Kinuna ni Varilla a kaaduan dagiti naireport kaso iti dengue ti Cabugao (26), idinto a sumarsaruno ti Candon City ken Sta. Cruz  (17), Sinait (16), Narvacan (12),  Suyo (8), ken dagiti dadduma pay nga ili a pakairamanan ti San Juan, Sto. Domingo, San Ildefonso, Sta. Maria, Sta. Lucia ken dadduma pay.

Indagadag ni Varilla ti agtultuloy a panagdaldalus dagiti umili kadagiti paraanganda ken iti panagipattogda kadagiti amin a mabalin a pagindegan ken pagitlogan dagiti lamok.

Kinunana a kasapulan ti panagannad dagiti umili iti bulan ti Agosto, Setiembre ken Oktubre a manamnama a panagtutudo ken panagadu dagiti lamok.#