sinursuran-banner-sqSinursuranNi Jobert M. Pacnis

Kastoy ti aramidem ita a Paskua

ITAY napan a tawen, malagiptayo pay no ania dagiti inkarkaritayo nga aramiden? Ti saludsod ita, ania kadagitoy ti natungpaltayo?

Umayamuom manen ti ayat a namunganay iti maysa laeng a kulluong. Ket ammotayon a daytoy ti katan-okan nga ayat. Nayanak ti Mesias tapno umaynatayo subboten kadagiti nagkamtudantayo. Immay a nakanumnumo, immay tapno agsakripisio para kadatayo.

Awanen ti sabali pay a makaaramid ti kasta!

Ti bagitayo, kunada, ti templo ti Dios. Mayannatup ngarud a kitaentayo ti pannakasaluad daytoy. Saan laeng nga iti pisikal nga aspeto. Ngem kangrunaanna koma, iti espiritual nga agpang.

Nadakamattayo idin no ania ti rumbeng nga aramiden tapno maitan-ok daytoy a bagi… daytoy a templo ti Dios. Ket naminanotay metten a nagsapata a saluadantayo ti bagitayo, ti kakaisuna a biagtayo.

Mausar koma ti biag a mangitan-ok iti Namarsua!

Ngem kasla saan sa a kasta ti napasamak iti malikudan manen a tawen iti biagtayo.

Gapu ta saantay’ met nga agtungtungpal iti aramid a mangidur-as kadatayo, ita a Paskua, adda sumagmamano a madakamattayo a rumbeng nga annongen. Bareng maipangag itan dagitoy. Ammuem:

Umuna unay, saan a sanudan ti ania man nga awis. Aglalo no nagtaud kadagiti nabayagen a di nakita a gagayyem wenno kaadalan. Kangrunaan dagiti kabagian. Mapantayo latta. Narigat ti mangpabain. Narigat ti mabagaan a ditayon am-ammo ida. A napangatotayo la unayen.

Ket iti tunggal awis, masapul nga agrennek kadagiti taraon. Siempre, ania pay koma no di dagiti nataba, naapgad ken nasasam-it. Maminsan laeng met iti makatawen daytoy nga okasion. Baka no ibagada pay a killjoy-tayo no aginmimikkitayo a sumango.

Kadagitay met maipasango a mainum, sige latta met. Bay-am ‘ta kanayon nga alkohol ken soda. Manen, maminsan met laeng iti makatawen ti kastoy a panagsasarak, ken panagiinniliw. Ipapas ngarud ti agragsak.

Kuna ngarud dagitay am-ammotayo: makakaankanto pay no nagunnaten dagiti dua a saka? Agpayso met, saan?

Nalawag met ngata dayta. Isu a no ditay’ natungpal ‘tay nasaotayo iti napalabas a tawen a saantayo unay nga agpalpalalo kadagiti makadangran a makan ken mainum, ibagbagak itan ti kasunganina. Amangan no ibagayo a siak met ti KJ.

No pinatgantayo ti maysa nga awis, ibagbagak manen, patgantayo koma amin. Narigat ti makapabain iti rikna, di kadi?

Di kadi umatiperper latta dayta a kaan ken inum. Inaldaw. Agingga iti panangpasungad iti Baro a Tawen. Adda pay bonusna no dadduma. Umabot pay iti Aldaw Dagiti Ari ti ragragsak no kaskasano.

Maikadua, no agingga’t mabalin bay-antayo metten dayta panangipawpawil dagiti otoridad ti panagpaputok aglalo kadagitay ilegal. Ania ketdin, panawen ngarud ti ragragsak. Aramidentayo ti amin tapno saan nga agbalin a boring dayta nga aldaw. Ania met ti ragsakna no daan a kaldero, lata kada aluminum a batia ti usarentayo a pangsarabo iti Paskua ken Baro a Tawen?

Ud-udong, kunadanto pay kadatayo!

Iranatayo pay ketdi ti agpaputok, a, no kasta a naasseng wenno naulawtayo. Ad-adda nga adda thrill-na no kasta. Ken no kakakkakaantayo iti kankanen a diket. Sa i-Facebook live-tayo. Ania ti ammotayo no ag-viral. Di agsikattayo pay? Ay, panguartaan met ti adu ti followers-na iti social media, ‘la!

Maikatlo, bay-antayo dagita kaarruba a nangtsistsismis kadatayo. Apay a datayo ketdin ti umasideg kadakuada. Paapalantayo ketdi ida, a! Wenno saantay’ nga ikankano ida. Apay, isuda la ti maymayaten? Saan pay laeng!

Pudno a Give Love on Christmas Day. Ngem ania met laengen ti riknatayo a pinaspasakitanda? Ita ta makitada a medio nakatallapawtayon, isu ti yaasidegda? Kayatdatayo laeng, a, a kibkiban. Wenno panguartaan! Singkaaduanna ti kasta ita a panawen!

No asino dagiti nasayaat kadatayo idi panawen ti panagkaradaptayo, isuda ketdi, a, ti ikkantayo iti pateg. Saan a dagita nangipabpababa kadatayo. Kuna dagiti Tagalog, ano sila, sinuswerte?

Maikapat, bay-antayo man dayta agwatwat kalpasan dagiti adu a nakaawisan. Makaammon ti bagi a mangproseso kadagiti impauneg. Kunada ngarud a natural iti bagi ti panangusarna kadagiti naipauneg a bitamina ken mineral. Ibellengna met dagiti dina mausar, kangrunaan dagiti (maka)sabidong.

Iti met aspeto nga espiritual, saantay’ koma a patpatien a matungpal ti kalikagumtayo no makompletotay ti Misa De Gallo. Panunotentayo, a. Namin-ano kadin a nakompletotayo ti siam a parbangon? Ngem natungpal kadi dagiti dawattayo? No amiresen ngarud ket kasla pay rimmigat ti panagbiagtayo.

Taktak laeng dayta. Ibusenna ti oras nga agragsaktayo koma. Iturogtayo laengen tapno adda pamigsa iti inaldaw a panagtrabaho. Wenno para iti sumaruno a pakaawisan.

Maysa pay, pagbasbasolan laeng ti ipapan iti simbaan. Saantayto met laeng a di mataliaw dagitay babbai a permi ti panagaruatda. No labsen ti agsao, makitan ti sibubukel a kinarakaranda. Mayulotay’ pay ti sermon ti padi no kasta? Pakabasbasolan pay!

Inayontayo pay dagitay kanigid-kanawan a maimatangan a baro amin a pagan-anay. Yap-apalantayto man laengen ‘ta bagbagitayon. Tagibassitentayto la ketdi ti kinataotayo.

Ket no makitatayo pay dagitay nangangato ti timidda a kalugarantayo? Aysus, amangan no agburek ti riknatayo ket saantay’ a mapanunot nga addatay’ iti uneg ti simbaan.

Aglalo no dagitoy dagitay lidertayo a di pulos ammo makaammo ti kaipapanan ti panagserbi. Paserserbianda ketdi, a!

Ammotayo metten a pangkalub ti singkaaduanna ti madi nga aramidda ti ipapanda kampay idi kanayon nga isusuknal. Ngem rinuker met ti unegda!

Napipia la ngaruden a no kayattayo a ma-internalize, maadal a naimbag ti sermon, iti lattan telebision ti pakimisaantayo. Mabalin pay a pabpabulonan iti panagpayubyob ti panagbuyatayo. Iti simbaan, maaramidtayo ngarud dayta?

 Nalabit, matungpaltayo aminen ita dagitoy a nadaldalawatko. Ta iti kallabes, inyaleng-alengtayo dagiti nagbabagas, nagpipintek a nasao a masapul nga annongen kas maysa a Kristiano.

Ngem sakbay gayam a tungpalen amin dagitoy, ipalagipko laeng ‘tay limmabas iti FB-k. Kastoy kano ti mapasamak itoy a panawen ti Paskua: Disiembre 16, inum; Disiembre 17, inum; Disiembre 18, inum… inum agingga iti panangpasungad iti Paskua ken Baro A Tawen. Enero 1, mayospital. Enero 2: naunnaten dagiti saka!

Nasayaat laeng no agpatingga dita. Kasanon ngay no iti pannakisangotayo iti Namarsua ket dinatayo nga am-ammo?

BASSIT laeng daytoy a pagpampanunotantayo amin ita a Paskua. Ket nalaka laeng met no ania ti rumbeng a pilientayo. Saan a kasta ti karigatna.

Narigrigat nga amang ti yuumay ni Kristo a kas tao tapno agsagaba para kadagiti basbasoltayo. Narigrigat nga amang ti panangispalna kadatayo manipud iti tuok ken rigat.

Kas maysa ngarud nga anakna, iti amin a kabaelantayo, saluadantayo ti bagi/biag a sagut ti Dios iti tunggal maysa kadatayo. Saantayo nga ipalubos a runoten daytoy ti madi nga aramid. Agbiagtayo a kas Kenkuana: napakumbaba ken naayat.

Ta dayta pay laeng ti kapatgan a maisaguttayo Kenkuana!

Naragsak a Paskuatayo Amin!●