Kasungani ti estatistika ti Neda, ekonomia ti rehion I agprobproblema: DV

LA UNION – Kasungani iti ipakpakita ti estatistika ti National Economic Development Authority  a dumurdur-as ti panagbiag dagiti umili ditoy, agsagsagaba ti rehion iti problema iti ekonomia.

Daytoy ti pammaliiw ni Gov. Deogracias Victor “DV” Savellano nga imbatadna iti taripnong itay nabiit ti Regional Development Council, Region I a tinabunuan dagiti  regional directors, NGOs ken dadduma pay a kameng.

“Saantayo a pabasolen dagiti agduduma nga ahensia iti kastoy a mapaspasamak. Ti makitak, agtugtugawtayo laeng iti taaw ti oportunidad. Masapul nga agkutitayon ta no saan, sigurado a mabatitayo,” kinuna ni Savellano.

Kinuna ni Savellano a saan nga agballigi dagiti gakat a mangpadur-as iti sibubukel a rehion uno no awan ti panagtitimpuyog dagiti kameng ti regional development council iti rehion.

“Uray ipalpalalotayo ti agaramid kadagiti gakat a mangpadur-as iti sibubukel a Rehion I, saanto a magun-od daytoy no awanantayo iti timpuyog. Masapul a maymaysatayo iti puso, maymaysatayo iti panunot ken addaantayo iti maymaysa a direksion,” inyunay-unay ni Savellano.

Kinuna ti chairman a napintas a tutokan ti RDC ti pannakapasayaat ti benneg ti agrikultura tapno mayataday iti kayat ni Presidente Gloria Macapagal Arroyo nga agbalin ti Amianan a Luzon a kas North Luzon Agri Business Quadrangle.

Kapaliiwan pay ni Savellano nga adda dagiti produkto ti agrikultura ditoy a taga-sabali a rehion ti agnumnumar kas iti ube jam a mailaklako iti Siudad iti Baguio ngem produkto ti Sugpon.

Impanamnama ni Savellano ti pannakitinnulong dagiti maseknan nga ahensia  nga ipaayanda dagiti taga-Sugpon, Ilocos Sur kadagiti agduduma a ramit ken puonan tapno isudan ti mangproseso iti produktoda nga ube.

Naammuan ti gobernador bayat ti pannakaidanon ti outreach program ti gobierno probinsial babaen ti Kakailian nga Agnaed iti Barangay Sangsangkamaysa nga Agrang-aytayo (KABSAT) a dua a kompania iti Baguio City ti pagilaklakuan dagiti agmulmula iti apitda nga ube.

Manipud  iti P20 agingga iti P35 ti tunggal kilo ti panaglako dagiti mannalon iti Tancamco ken Good Shepherd kadagiti mulada nga aramiden dagitoy a kompania nga ube.

Pagaayat dagiti turista a gatangen ti ube jam no maidaw-asda iti Baguio City.

Limtuad pay bayat ti outreach program a problema dagiti agnaed iti Alilem ti panangidaliasatda iti produktoda iti bulan ti Hunio agingga iti Oktubre a kangina ti ube gapu ta saanda a makalasat iti napegges a karayan a ballasiwenda gapu iti kaawan ti rangtay a kumamang iti ilida.#