Footer

Kataktakem a barangay officials, dida ammo dagiti naipasan nga ordinansa?

VIGAN CITY – Adda dagiti ordinansa a naipasa ditoy siudad a saan a mayim-implementar agsipud ta saan nga ammo dagiti opisial iti barangay ti kaaddada?

Limtuad daytoy kalpasan a saan nga inaksionan ti Sangguniang Panlungsod bayat ti sessionda itay Hunio 10 ti ordinansa nga impasa ti Barangay Bulala a mang-regulate iti pannakailako ti arak kadagiti menor de edad iti nasao a barangay.

Naipalaon iti report ti committee on rules, legal matters and human rights nga idadauluan ni Konsehal Benjo Verzosa nga addan agdama nga ordinansa maipanggep iti pannakaiparit a mailako ti arak kadagiti menor de edad nga inaprobaran ti City council a maiyim-implementar kadagiti 39 a barbarangay iti sudad.

Kanaig daytoy, impaganetget ni Konsehal Loreto Quibilan ti nainget a panangmonitor ti Oversight committee para iti nainget a pannakaipakat dagiti ordinansa a naaprobaran iti konseho kas iti implementasion ti liquor ban kadagiti menor de edad.

Sinaludsod ketdi ni Konsehal George Villanueva, chairman ti oversight committee, no adda dagiti ordinansa a saan a maipatpatungpal iti siudad.

Kinuna ni Verzosa nga adu dagiti kabarbaro a nagtakem ket kasapulan ti pannakaipaay iti kopia dagiti ordinansa kadagiti barbarangay tapno iti kasta maammuanda ken maiyemplementarda dagitoy kas dagiti linteg mainaig iti transportasion, investment youth ken market.

Kabayatanna, inaprobaran ti konseho iti maikatlo ken pinal a pannakaibasana ti nasurok kagudua milion a pisos a supplemental budget para kadagiti personnel ken sumagmamano nga opisina ditoy.

Naipalaon iti Appropriation Ordinance No. 2 ti  pannakailatang ti P572,400.00 supplemental budget para iti sueldo dagiti empleado ti gobierno ti siudad a pakaibilangan ti opisina ti public safety, permit and licensing, city administrator, CPDO, city civil registrar, GSO, City veterenarian, agriculture , market, Fernandina de Vigan, ken City tourism.#