Katulagan ti gobierno probinsial, NFA: agbinnuligda a gumatang iti mais

VIGAN CITY – Agbinnulig ti gobierno probinsial ken ti National Food Authority nga aggatang iti apit a mais dagiti agmulmula ditoy tapno malapdan ti pannakagundawayda kadagiti traders ken tapno adda garantia a pakailakuan ti produktoda.

Daytoy ti linaon ti memorandum of agreement mainaig iti corn marketing assistance program a maited kadagiti industry producers, users ken local government units a nagpinnirmaan itay Marso 18 da Gov. Deogracias Victor “DV’ Savellano a nangibagi iti gobierno probinsial ken ni Assistant Regional Director Basilides Taco a nangibagi iti NFA .

Sagudayen ti MOA a mangrugin nga aggatang ti NFA iti mais a katinnulong ti gobierno probinsial, P7.00 ti bagi ti NFA idinto a P6.00 ti bagi ti gobierno probinsial tapno agbalin a P13 ti presio ti mais kada kilo.

Iti agdama,  P11.50-P12.50 ti  presio ti mais kada kilo.

Kinuna ni Taco a babaen ti nasao a katulagan, mabenepisiaran dagiti  mannalon  itoy a programa ta kumitada iti agdama a prevailing price, ket maaddaanda iti kanayonan a kita no iti NFA nga ilakoda dagiti produktoda a mais malaksid a mausarda pay a libre dagiti pasilidad ti NFA.

“Ti Ilocos Sur ti kaunaan iti intero a pagilian a naaddaan iti naiyimplimentar a programa iti corn marketing assistance,” kinuna ni Taco.

Kabayatanna, nangipaayen ni Savellano iti P3 milion kas premium fund tapno naan-anayen ti pannakayimplimentar ti nasao a programa a mangtulong kadagiti agmulmula iti mais.

Kinuna ni Savellano a ti panagganar dagiti mannalon ti adda iti panunotna idi indatag ti NFA ti nasao a  programa kenkuana isu nga immannugot a dagus.

“Ituloytayo laeng daydi inrugitayo idi 2001 a panaggatang ti gobierno probinsial iti produkto dagiti mannalon a mais tapno malapdan ti pannakagundawayda ken tapno adda garantisado a pakailakuan dagiti apitda,” kinuna ti gobernador.

Inkari pay ti gobernador ti panangipaayna iti kanayonan a premium fund tapno agtultuloy ti nadakamat a programa.(Mancielito S. Tacadena/NBN Vigan)