Footer

Kaunaan nga ATM ti kooperatiba iti Amianan a Luzon, naipasdek

STA. CRUZ, Ilocos Sur – Kinuna ti maysa a dati a bokal a kabaelan ti maysa a kooperatiba ti rumang-ay ken mangipaay iti napimpintas a serbisio kadagiti babassit nga umili.

Imbatad daytoy ni Engr. Jose Ping-ay Jr., dati a bokal iti probinsia ken agdama a board chairman ti Board ti Sta. Cruz Savings and Development Cooperative (SACDECO) bayat ti inagurasion itay Agosto 8 ti kaunaan a naipasdek ditoy probinsia nga automated teller machine (ATM) ti maysa a kooperatiba iti amianan ti Metro Manila.

“Nupay makunkuna a poor man’s bank ti SACDECO, mangipapaayen iti serbisio nangruna kadagiti umili a marigrigat,” kinuna ni Ping-ay.

Kas suportana iti  kooperatiba, nangideposito ni Diputado Eric Singson iti P50,000.

Ni Singson ti kangrunaan a sangaili iti pannakainagurar ti ATM ti kooperatiba a tinabunuan met da CDA regional director Ernesto Rosario, CDA assistant director Josefina Bitonio, General Manager ti Nationlink Gerardo Eugenio, ken dadduma pay a sangaili.

Inlawlawag  ni Ping-ay nga adda iti panangimaton ti Nationlink ti ATM .

“Wen, mabalin nga ag-withdraw ditoy dagiti dadduma pay a kita ti ATM kas iti Megalink ken uray dagiti ATM a naggapu kadagiti commercial banks,” kinuna ti dati a bokal.

Kinuna ni Ping-ay nga iti pannakaipasdek ti ATM service iti SACDECO, namnamaenna a sumarsaruno dagiti dadduma pay a kooperatiba iti sangkapagilian tapno ad-adu pay ti maserbian nga umili.

Kabayatanna, imbatad ni Singson a makitinnulong kadagiti kooperatiba iti pannakagatang iti ganagan a maited iti nalaklaka a presio kadagiti mannalon.

“Makaalatayo iti abono  iti nalaklaka a presio nga ipaaytayo kadagiti mannalon.  Makitinnulongak iti kooperatiba,” kinunana ti deputy speaker.

No mapatuloy daytoy a gannuat, maikkatan iti 20 agingga 25 a porsiente ti presio ti ganagan nga imatonanto dagiti kooperatiba ti pannakagatangda.

Kangrunaan a saning-i dagiti mannalon ti kangina ti presio ti ganagan.#