sinursuran-banner-sqSinursuranNi Jobert M. Pacnis

Ket Kasapulan ti Panagdalus

Kolum : Sinursuran

Ni Jobert M. Pacnis

(Umuna a paset)

 

KALPASAN ti panagpiesta iti sango ti lamisaan itay kasangay ti Mesias ken pannakasarabo ti Baro a Tawen a sabali manen a sagut ti Dios, ania ti masapul nga aramiden kalpasanna?

Adu dita ti agsubli manen iti panggedanda tapno iti maminsan pay, agteggedda para iti patpatgenda a pamilia. Dagiti dadduma, iti pagadalan tapno ituloyda latta a tun-oyen ti/dagiti arapaapda.

Itoy met a panawen, masuratan dagiti papel kadagiti resolutions a kayat nga ipatungpal wenno aramiden kadaytoy Baro a Tawen. Resolusion a kaaduanna a di met matungtungpal. Nupay kasta, nagbalinen a paset iti kulturatayo daytoy a banag. Napintas ti namunganayan ken panggep daytoy. Pagsarmingan iti kayat nga aramiden iti biag para iti pannakatun-oy ti kinaan-anay ti kinatao.

Ngem kas nasaon, iti kaadu dagiti pakaburiboran kadagitoy a panawen ti kompiuter, saanen a maik-ikkan iti importansia dayta. Maiwagwagaten. Saanto met laeng a matungtungpal dagiti adda iti listaan a kayat nga aramiden iti biag. Napatpateg laengen ti panagkari iti bagi, agresolusion iti panunot— ‘tay awan pakakitaan a nakaisuratan tapno saanto a maisidsidir no di matungpal.

Ala, ti napateg laeng met kadaytoy baro manen a pannakigasanggasat iti biag ket ti panangabaruanan. Mabigbigtayo koma dagiti nagkamtudantayo iti naglabas a tawen. No ania dagiti inannong a di mayalubog iti nabalitokan a pannusuro, rumbeng a baliwan. Rumbeng nga uyosen iti biag; isuot dagiti banag a mangitan-ok iti biag a kapatgana  sagut ti Dios iti tunggal maysa kadatayo.

Wen, ti bagitayo ti templo ti Dios. Mayannatup la unay nga ipateg/tagipatgen; usaren iti pannakaidaydayaw ti Naganna.

Tapno ngarud agbalin a nabunga daytoy a sagut ti Dios, ammotayo nga iliklik iti pakadadaelanna (pisikal man wenno ispiritual). Iti aspeto a pisikal, saantayo met laeng maragpat dayta panggeptayo no adda a daddadaelen ti bisio ti bagitayo; no adda a marmarsaak ti pisikaltayo iti ipapaunegtayo a taraon.

Gapu ta iti naglabas a bakasion, kanigid-kanawan ti makan, saan a karkardayo ti kaadu ti naipaunegtayo a makadadael iti salun-attayo. Ta nagrigat la ketdin, aya, ti di dumar-ay kadagiti pakaawisan aglalo no reunion dayta kadagiti dati a kaadalan iti elementaria wenno haiskul; ken reunion metten kadagiti kakabagian. Kanito daytoy apanagpipinnadamag, inniliw ken panangleplep iti dayta kurang iti nagbabaetan. Ala, napintas la unay. Pagdaksanna, kadagitoy met a kanito a madadael a maminpinsan ti bambantayantayo a dieta.

Mabalin nga irason a maminsan met laeng daytoy iti makatawen.

No kasta ngarud, kalpasan ti panagipauneg kadagiti basura a taraon, masapul ti panagdalus. No paraangan koma, masapul a masagadan dagiti rugit tapno iti kasta napintas a buyaen ken nadalus ti angsen nga anginna; awan ti bayrus kada bakteria a mangted iti sakit. Kasta met iti unegtayo, rumbeng a dalusan, ikkaten dagiti naipauneg a taraon a tulbek ti panagwaras dagiti “ganggannaet” iti bagi a mangibunga iti sakit. Napia laeng no dagitay sakit a nalaka laeng a leplepan dagiti agas. Kasanon ngay no dagiti mananglib-at a sagubanit? Nakasalsalun-atka a magmagna/kitkitaen, pagam-ammuan, matungbaka lattan ket bulonmon a di tumakder. Mapankan a kellaat.

Simple laeng met daytoy panagdalus a kasapulan. Kadawyan a mangmangngegen daytoy uray idi addatay’ pay laeng iti uneg ti pagadalan. Maul-ulit laeng no kasta nga adda sagubanittayo ket addatayon a leklektiuran ti mangngagas.

Masapul laeng ti panagipauneg kadagiti adu/agduduma a nateng ken prutas. Segun kadagiti eksperto, nasaysayaat kano dagitay nateng ken prutas a natayengteng ti marisda. Ad-adu ti phythochemicals a makatulong iti bagi. Ken no mabalin, ipauneg dagitoy a di naluto— raw kunada iti Ingles. Madadael ngamin dagiti dadduma/no di man kaaduan kadagiti imetda a sustansia.

(Adda tuloyna)