sinursuran-banner-sqSinursuranNi Jobert M. Pacnis

Ket Nagunggon ti Pagilian

Kolum : Sinursuran

Ni Jobert M. Pacnis

(Maikadua a paset)

 

No nairana la a napasamak ti ginggined iti kaadda ti serrek iti opisina ken pagadalan, saan a di bumurong nga ad-adu dagiti nagbalin a biktima a biag. Pagpiaanna ketdi ta adda dayta naideklara a holiday. Ken no nairana met a napasamak daytoy iti siudad wenno ti Marikina fault line ti nagkurri iti kastoy kapigsa, ania ket ngatan a kaadu ti biag a mapukaw ken sanikua a madadael!

Kadagiti kailian a biktima itoy, tungpal biag nga imetda dagiti nakaal-alingget a padasda. Agpapan a masursurat daytoy, addada pay laeng dagiti biktima a di pay narekober. Umad-adu met dagiti sink holes a lumlumtuad. Iti palawag dagiti maseknan, saan a nakakaskasdaaw daytoy ta mapan nga 80 porsiento ti Bohol ken Cebu ti limestone ti uneg ti dagada.

Makakuddot met iti barukong/kinatao ti kapadasan dagiti ubbing nga aglanglang-ay laeng iti maysa a dissuor idi pagammuan ta naggidday ti bantay iti asidegda ket isu metten ti panagtangep ti narimat koma a masakbayanda. Nupay kasano a panunoten, kasla imposible a mapasamak ti kastoy kadakuada.

Ngem ania ngarud, nakaparsuaanen ti nagkurri!

Nupay kasta ti napasamak iti Bisayas, adda latta met dagiti istoria ti namnama ken mangbibiag iti kinapositibo ti tunggal maysa. Addada dagiti naisalakan a biktima nupay napandaganda kadagiti narippuog a paset ti bantay, pasdek wenno balay. Kadagiti met simbaan, nupay kasla napulbosen ti pakabuklanna dagitoy, adda dita a di naan-ano dagiti rebulto dagiti simbolo ti panagdaydayaw.

Inlisi/tinarabay ida ti nabileg nga Ima, awan duadua! kasta ti panagkuna ti tao.

Gapu itoy, ad-adda nga immuneg ti pammati dagiti agindeg. Adu dagiti nakulding/nakalbit itoy a pagteng. Masapul ti panagsubli iti Dios, kunada.

Wen nga agpayso! Napintas a pagiinnadalan. Iti kinapardas ti biag ita, tapno makakamat, adu kadatayon ti nakalipat iti relasiontayo iti Namarsua. Awanen dayta pannakipatang Kenkuana babaen ti panagkararag. Adu ti maibagatayo a rason no apay a ditayo man laeng makasuknal iti simbaan maminsan iti makalawas. Ditayo man laeng ammo a taliawen dagiti grasia a naawattayo iti inaldaw-aldaw.

Isu a dayta, kinalbitnatayon ti Dios, kuna dagiti dadduma.

Daytoy a panangkalbit koma ngarud ti agbalinen a rangtay/tulbek iti panagsublitayo Kenkuana. Ania ketdin a nagimnas ti biag/agbiag no adda ti Apo iti puso ken kinataotayo iti inaldaw-aldaw. Awanen ti rumbeng a pagbutngantayo. Agbiagtayo a siraragsak ken sikakappia.

Iti baet dagitoy a didigra a mapaspasamak iti pagiliantayo, iti maminsan pay, nariing manen ti kinamanagtulongtayo a puli. Aglaylayus dagiti tulong nga aggapu, saan laeng a kadagiti institusion, foundation, gobierno ken addaan, no di ket uray pay kadagiti nanumo a kailian. Uray bassit ti maisaranay no mapagtitipon, dakkel daytoyen a banag. No nakapulpulostayo, makatulongtay’ latta babaen ti kararag a mairuknoy kadagiti biktima.

Naimbag la unay dagiti addang ita a maisubli dagiti Nailian a Tawid a rinippuog ti ginggined. Nupay inaklon dagiti eksperto a narigat ken dakkel ti magasto iti pannakaisubli ti dati a pasdek (kas iti simbaan); ken naunday ti panawen nga urayen, makaparagsak a panunoten a pursigido dagiti maseknan iti pannakaisubli dagitoy a Tawid.

Iti biang ti gobierno, agaramid koma kadagiti pulido nga addang tapno maliklikan ti adu a biag ken sanikua a maidaton no adda pay sumangbay a ginggined. Kitaenna itan dagiti suhestion dagiti eksperto.

Ta iti udina, dagiti latta umili  ti kangrunaan a gameng ti maysa a pagilian!#