Footer

Kiddaw ti ISECO GM kadagiti members-consumers: Suportaran ti pannakanayon dagiti transmission lines

VIGAN CITY –Madaman ti pannakaipatakder dagiti natayag ken kabarbaro a poste ti Ilocos Sur Electric Cooperatives iti abaga ti National Highway iti Ilocos Sur tapno manayonan ti power transmission lines kadagiti nagduduma a sub-stations tapno mapasingkedan ti natalged a supply ti koriente, ket kasapulan a dagiti pribado a daga a pakaibangonan dagiti poste ket disnudo koma nga ipalubos dagiti akinkukua ta dayta ket para ti sapasap a pagsayaatan dagiti amin nga agar-aramat iti koriente.

Dayta ti inrakurak ken apila ni ISECO General Manager Engr. Egdon Sabio kadagiti kameng ti Ilocos Sur Integrated Press kabayatan ti naangay a Kapihan iti Amianan Media Forum.

Inlawlawag ni Engr. Sabio ti gannuat ti ISECO a mangnayon iti sub-station sadiay Santa Cruz, ken nayon a power transmission lines tapno mapatalgedan ti agtultuloy ken tumutop a supply ti koriente uray no adda dagiti madadael a linia. Inlawlawagna a paset ti gannuat ti pannakaipatakder dagiti baro ken natayag a poste ti koriente iti abay ti National Highway.

Inlawlawagna a sursuroten ti ISECO ti katulaganda iti Department of Public Works and Highways a mabalinda nga ipatakder dagiti poste ti koriente iti las-ud ti 10 a metro manipud iti tengnga a linia (center line) ti National Highway ta sakup pay laeng ti DPWH. Inaklonna nga adda dagiti lugar a maipatakder dagiti poste iti ruar ti kukua ti DPWH, ken iti las-ud dagiti pribado a lote. Nagapila nga ikkan koma dagiti private land owners ti right of way dagiti maipatakder a poste a para ti sapasap a pagsayaatan dagiti members-consumers ken kadagiti amin nga agus-usar iti koriente.

Impaganetgetna a nasken ti pannakaisayangkat dagiti programa a mangpatalged ti supply ti koriente iti Ilocos Sur tapno makaawis kadagiti dadakkel nga investors, kas ti pannakaipatakder dagiti shopping malls ken dadduma pay a commercial establishments a mangipaay ti pagsapulan ken panagdur-as dagiti umili.

Impasingkedna a dagiti kabarbaro ken natayag a poste ket natalged ken makabael a mangsaranget uray kadagiti napigsa a bagyo. Nagapilar kadagiti pribado a tattao ken opisial dagiti local government units iti suporta ken tulongda iti pannakaipatakder dagiti poste ken linia a koriente kadagiti lugarda.

Inlawlawagna pay a saan a maliklikan ti ingingina ti singir ti koriente gapu ti panagbaba ti foreign exchange wenno balor ti piso gapu iti inflation, ken epekto ti value added tax kas mayataday iti Tax Reform for Acceleration and Inclusion Law a nangpangato ti buis dagiti coal a kangrunaan a pagaron dagiti coal power plants iti Pilipinas. Impalgakna a nababbaba pay laeng ti singir ti ISECO no maidilig kadagiti dadduma nga electric cooperatives iti pagilian.

Inlawlawag ni Engr. Sabio a kaaduan kadagiti electric cooperatives ket gumatgatang iti koriente kadagiti coal plants ta nalaklaka ngem kadagiti dadduma a power sources. Impalgakna a nangingina ti singir dagiti planta nga agpatpataud iti koriente babaen ti renewable energy kas ti init, angin ken danum ta dagitoy ket kasapulan ti sigud a pannakausar ti koriente nga agtaud kadagiti plantada.

Impakaammona met ni Mr. Clarence Ducusin, ISECO Spokesperson, iti panangrambak itay Agosto iti National Electrification Month. Dagiti amin a kooperatiba, pakairamanan ti ISECO, ket nangisayangkat iti Ilocos Sur ti tree planting ken candle lighting ceremony a nakaseggedan dagiti 16 a kandela a simbolo dagiti 16 a sitio kadagiti nagduduma nga adayo a barangay kadagiti upland municipalities a saan pay a nadanon ti linia ti koriente.

Inlawlawagna nga adda subsidy ti gobierno babaen ti National Electrification Administration a P1.4 Million iti kada sitio tapno maipaayanda iti linia ti koriente. Inlawlawagna nga iti Ilocos Sur ket saan nga agpatpatingga ti panaganak dagiti barangay kadagiti baro a sitio a gapu ti saan a pannakakompleto ti pannakaidanon ti linia ti elektrisidad kadagiti amin a sitio kadagiti nasulinek a barangay.

Impakaammo ni Mr. Ducusin ti gannuat ti NEA a pannakabukel ti asosasion dagiti members-consumers-owners, ken pannakapili dagiti opisial a presidente, bise presidente, secretary ken treasurer iti kada barangay; ken pannakabotos dagiti federated officials iti tunggal ili wenno siudad, ken probinsia, tapno ad-adda a mapatibker ti panaglalangen ken panagkaykaysa dagiti members-consumers-owners ti ISECO. (Eden Alviar)