‘Killer Maid,’ nakemmeg iti Pangasinan

Crime watch (stock photo by TNM)

ALAMINOS CITY – Nakemmeg dagiti polis ti Top 1 Most Wanted Person ti siudad ti Baguio, ni Marites Rilloraza Judan idi bigat ti Pebrero 6, daytoy a tawen. Kadua ni Judan a natiliw ti ka-live-in-na a ni Manuel Carbonel Balangatan, iti pagnaedanda iti Poblacion, Alaminos City, Pangasinan.

Ni Judan ti kangrunaan a suspect iti panagtakaw ken pammapatay iti maysa a 15-anyos a balasitang nga anak ti amona kas house maid iti Pinsao Proper, Baguio City, idi Mayo 24, 2016.

Segun iti report ti PNP, karaman pay ni Judan kadagiti insidente ti panagtakaw idi laeng Enero 5, daytoy a tawen, a napasamak iti Sta. Cruz, Ilocos Sur ken Bangar, La Union. Adda pay nakapila a kaso ti adultery laban iti suspek iti San Fernando, La Union.

Inallukoy ni Police Chief Superintendent Romulo E Sapitula, Regional Director ti PNP Regional Office 1, dagiti biktima ni Judan tapno ag-report iti polis ken mangipila iti kaso laban iti suspek.

Addan ni Judan iti ikot ti Alaminos City Police Station. (Tawid News Team, base iti report ti PNP PRO1 PIO)