Kimmirang maparparti a baboy: slaughter master

VIGAN CITY – Kinuna ti mangimatmaton iti pagpartian a bimmassit ti bilang dagiti maparparti a baboy manipud pay idi Enero daytoy a tawen.

Kinuna ni Slaughterhouse master Arnulfo Quitoriano a 43 laeng a baboy ti naparti idi Pebrero 18 idinto a 49 laeng ti bilang dagiti baboy a pakairamanan ti letson ti naparti iti Pebrero 19.

Iti daytoy nga aldaw ti pannakaangay ti miting iti nagbaetan dagiti hog raisers, meat vendors ken dadduma pay a maseknan nga ahensia ti gobierno ti siudad tapno risutenda ti problema ti presio ti karne ti baboy a mailako iti tiendaan publiko ditoy.

Napag-aanamonan iti miting ti pannakaipangato ti presio ti karne ti baboy iti P150 kada kilo.

Kinuna ni Quitoriano nga iti napalabas a tawen, sumurok-kumurang a 60 ti maparparti iti inaldaw iti slaughterhouse.

Idi dinamag ni Jun Ramos ti DWRS bayat ti interbio daytoy kenkuana no intuloy dagiti dagiti aglaklako iti karne ti baboy ti pangtada a dida panagparti idi imbilin ti konseho ditoy siudad ti rollback iti presio  ti karne ti baboy agingga iti di maaksionan ti petisionda a pannakaingato ti presio ti karne ti baboy manipud P140 iti P150, impalgak ni Quitoriano nga adda sumagmamano a meat vendors a nangiyawid iti baboyda iti sumipnget ngem insublida met laeng iti parbangon.

Adu nga aggatgatang ti nagreklamo iti kellaat a panangipangato dagiti meat vendors iti presio ti karne ti baboy ditoy siudad iti P150 idinto a di pay inaksionan ti konseho ditoy siudad ti petisionda.

Kabayatanna, kinuna ti maysa nga agtartaraken iti baboy a bimmassit ti maparparti a baboy agsipud iti nangina a pagpakan iti dingnguen kas iti feeds.

Iti kallabes, areng-eng dagiti agtartaraken ti baboy ti kabayag ti pannakabayad ti dagiti inlakoda a baboy.  Segun dagiti dadduma, sa la agbayad ti partidor kalpasan a malakona ti ginatangna wenno sumagmamano nga aldaw kalpasan nga inukodna ti baboyna.

Kinuna ni Quitoriano nga adun nga agtartaraken iti baboy ti maniguradon ket  saanda nga ilako ti baboyda no saan a mabayadan a sigida.

Segun iti maysa a meat vendor iti Cabugao, makadanon payen iti ilida dagiti taga-Vigan a mapan aggatang iti baboy nga ilakoda  gapu iti nakurang a suplay iti siudad.

Agrirriri payen dagiti meat vendors gapu ta kimmirang ti suplay ti baboy nga ilakoda iti Cabugao gapu iti idadayo dagiti taga-Vigan nga aggatang iti baboy.

Kinuna ni Quitoriano a kimmisang dagiti sumsumrek a baboy iti siudad, saan a kasla idi nga inaldaw wenno tunggal kanikadua nga aldaw nga adda sumangpet nga aggapu iti biahe.

Kinunana a saan a naituloy ti ordinansa a mangituding iti inspection fee kadagiti baboy a sumrek manipud kadagiti sabali a probinsia.

“Ita, awan ti singsingirenmi iti maiserserrek iti slaughterhouse,” kinuna ni Quitoriano.#