Pusa laeng, dimo kuna ta adda met rabis daytoy. Lalo no walang ken agbibiag iti langalang.
Saan a maibaga a nasalun-at amin dagiti walang a pusa ken aso. Agingga a di napaneknekan, nasaysayaat nga ipato lattan nga adda awitda a rabis. Isu a napeggadda.
Saan nga ang-angaw a napeggad dagitoy a walang. Saan met ida a pagang-angawan.
Pusa laeng, dimo kuna, amangan no maipadaka iti maysa a lalaki a natay a kinagat ti pusa a pinagang-angawanna a tiliwen sadiay probinsia ti Kalinga.
Ngem kas karina aya a matiliwmo ti maysa a pusa? Dagitinto pay taraken iti uneg ti balay no dinaka am-ammo ket ngerngerannaka, no dinaka ket pasabtan iti karamot.
Saan a nasingpet ken manakem amin a pusa. Adda met dagiti nauyong ken saan a makalawlaw iti killeb, lalo no walang daytoy ken makalawasen a di nangan. Aburido la ketdi, saan? Iti dayta a kasasaadna, samonto pay la pagangawan, lumaban kenka. No masaepna nga intensionmo a saktan wenno idadanes, awanen ti sabali pay pagpilianna no di isalakan ken depensaanna met ti bukodna a bagi. No saan a kumaramot, kumagat.
Saan a nakaramotan no di nakagat ti tangan ti lalaki a mangtiliw koma iti walang a pusa. Saan met a dakkel ti kagat ta nagbabassitan ti ngipen ti pusa.
Agpaagaska man, amangan no adda rabis daydiay a pusa, insingasingda kenkuana. Ngem, saan a nangitaltalek.
Pusa laeng daydiay. Bassit la a banag, kunana man.
Ngem kalpasan ti sumagmamano nga aldaw, dimtengen kenkuana dagiti sintomas. Nasakit nga ulo. Agsarwa.
Nakabutos pay laeng met idi napalabas nga eleksion uray no kasdiayen a marikriknana ti sakit ti ulona. Ti kaso, dina met kayat ti agpadoktor.
Kalpasan ti butos, kimmaro ti marikriknana. Nakaron ti agalna.
Pinadasda a patomaran bareng no kumalma ti sakit ti ulona. Ngem ne, mabuteng metten nga uminum! Kabutengnan ti danum! Saan laeng a dayta, saanna a kayat ti maanginan ta agpaypayegpegen iti lamminna. Saan a komportable kenkuana ti nalawag.
Itoy a punto, naalarma ti pamiliana. Impettengda a sabalin ti nasakitna. Binungonda iti ules sada intaray iti ospital.
Adda rabis ti pusa a nangkagat kenkuana, kuna dagiti doktor. Kinunada nga addan ti masakit iti nakain-inaka a kasasaad.
Intarayda ngarud sadiay San Lazaro Hospital bareng no masalbar ti biagna. Ngem nagsatan iti anges kabayatan nga adda iti dalan.
Daytoy ti maysa kadagiti kaunaan a kaso iti rabis manipud iti pusa. Wen, adda scientific findings a posible met a carrier ti rabis ti pusa ngem awan pay ti nairekord a biktima.
Itoy a gundaway, addan pammaneknek. Itoy a gundaway, pusa laeng, dimo kuna no dimo kayat a maungkel. Ti kasayaatan nga aramiden, ayatem met dagiti ayup, saan ket a dangran. Ipateg ida. Lalo dagiti walang.
Kasapulan ti panagannad a kas iti panagannad iti posible a mapasamak iti pannakilangen kadagiti aso.
Kangrunaan iti amin, basta nakagatka, iti aso man wenno pusa, bugguan a dagus ti sugat iti nadalus a danum ken sabon. Agpadoktor a dagus tapno maamiris no carrier iti rabis wenno saan ti kimmagat kenka.#
