Kinapateg ti kannawidan, naitandudo iti 2nd Begnas Festival

CANDON CITY – Ti pannakapreserba ti kannawidan a kaugalian ken kultura ti kangrunaan a naitandudo iti Maikadua a Parambak Begnas a naangay ditoy siudad idi Disiembre 29.

Kinuna ni Gov. Deogracias Victor “DV” Savellano a nakaited iti awareness daytoy a parambak iti kinapateg ti kannawidan dagiti nagkauna a tribua ket ita, ammon dagiti kameng ti importansia ti pannakapreserba dagitoy.

Kinuna ni Savellano nga adun ti nagbaliwan iti ugali dagiti kameng ti tribu manipud idi naangay ti immuna a Begnas.

“No mapanak kadagiti upland municipalities, agturongen iti cultural revival dagiti ipabpabuyada,” kinuna ti gobernador.

Immuna a nangay ti sagrado a Begnas ritual iti lugar ti Papatayan iti Calongbuyan, Galimuyod a nagdaydayawan ken nagdatonan dagiti kameng dagiti tribu ken ni Kabunian. Ditoy a naipresentar dagiti 7 a simbolo nga impaay ti didiosen ti tribu kas iti sumaganad: Seg-ang (bato) a mangirepresenter iti kaasi; pika kas simbolo ti kappia ken talna; pana kas simbolo ti ayat; kalasag kas simbolo ti kararag; sarukang kas simbolo ti panagmaymaysa; arpa kas simbolo ti aramid ken ruho kas simbolo ti agnanayon a biag.

Naangay met ti salip ti traditional ensemble iti Candon Civic Center. Ditoy a naipakita dagiti agduduma a kadaanan a salsala dagiti kameng ti agduduma a tribu.

Kabayatanna, inkari met ni House Deputy Speaker Eric Singson ti agtultuloy a suportana iti tinawen a parambak a makatulong iti pannakapasayaat ti kultura dagiti tribu iti probinisa.

Nagbalin a tema ti Begnas: Kultura ken Kannawidan, Rangtay ti Panagkakadua nga Ulidan.#