Kinarton a sigarilio, naduktalan iti panagsukisok dagiti polis nga awanan naan-anay a dokumento

CABUGAO, Ilocos Sur – Kinarton a sigarilio nga awanan iti masnop a dokumento ti naduktalan dagiti polis a nakadulin iti maysa a warehouse iti Salomague Port, ditoy nga ili itay nabiit.

Insayangkat dagiti nagtipon a puersa ti police provincial office ken ti Cabugao police station ti panagsukisok iti Salomague Port babaen ti pammilin ni Police Provincial Director Senior Supt. Noel Baguitan Amoyen.

Naduktalan dagiti polis bayat ti panagsukisokda nga adda kinarton a maysa a brand ti sigarilio a mapapati nga awan ti maitutop a dokumentona a naibodega iti maysa a warehouse iti mismo a Salomague Port.

Nupay kasta, impalawag ni Benjamin Zaragoza Jr., acting port collector ti Bureau of Customs iti Salomague Port, nga adda laeng kurangna a dokumento dagiti nadakamat a sigarilio ngem saan a maibaga nga adda problema dagitoy.

Mapapati a pinartuat ti maysa a kumpania a nakabase idiay Bulacan ti aganay sangaribu a karton ti sigarilio.

Kinuna ni Police Supt. Juan Collo a bantayan pay laeng dagiti polisna dagiti kuestionable a sigarilio tapno masiguro a saanda a mairuar ken maibiahe.#