Footer

Kinarton a sigarilio, relo, natakaw iti pagtagilakuan

STA. MARIA, Ilocos Sur – Maysa a pagtagilakuan sadiay Brgy. Maynganay Norte ditoy nga ili ti naireport iti police station ditoy a natakawan a mapattapatta a naisayangkat manipud iti alas 2:00 am agingga iti 3:00 am idi Enero 13.

Inreport ni Estella Devis y Cabero, 49, awanan asawa ken residente iti Barangay Maynganay Norte, ditoy nga ili, iti polis a sinerrek ti/dagiti mannanakaw ti Devis Farm Supply a pagtagilakuanna a masarakan iti nadakamat a barangay ket kinurimes dagiti nadumaduma a tagilakona.

Karaman dagiti mapukpukaw ti sangapulo ket uppat a rim ti Fortune cigarettes, 8 rims ti Marlboro cigarettes, maysa a rim ti Mighty Green cigarettes, 2  rims ti Philip cigarettes,  2  a Guess wrist watch, 4 a Lobour wrist watch, maysa a chain saw blade, selpon ken sensilio iti nadumaduma a denominasion.

Agdagup amin iti P50,000.00 ti balor dagiti natakaw iti pagtagilakuanna, daytoy ti pattapatta ni Devis kalpasan ti panangimbentariona kadagiti mapukpukaw a tagilakona.

Iti inisial a panagimbestiga dagiti polis, nakastrek ti di pay nabigbig a mannanakaw iti pagtagilakuan babaen ti panangdadaelna iti padlock ti ridaw babaen ti agatiddog iti maysa metro a tubo a landok a nasarakan dagiti inbestigador iti crime scene.

Mapapati a tinakaw ti di nabigbig a mannanakaw ti tubo manipud iti bomba ti danum ti kaarruba ti pagtagilakuan a balay a kukua ti maysa nga Alvin Disomiba.

Mapapati a naisayangkat ti panagtakaw iti nagbaetan ti alas dos agingga iti alas tres ti parbangon ti Enero 13.

Maysa a Liza Dariano, kaarruba ti natakawan, ti nagkuna a nakangeg kadagiti taul ti aso iti daytoy nga oras ngem saanna nga intaltalek.

Agtultuloy ti panagimbestiga dagiti polis mainaig iti nasao a panagtakaw.#