Footer

Kinasimple

Ni Jobert M. Pacnis
(Umuna a paset)

NAATAP ti ragsak, kunam? Panagriknam, saannaka man la a seknan ti ragsak/kinaragsak idinto nga ar-aramidem met ti amin a kabaelam?

Namin-adun a nabasak daytoy nga estoria iti agduma a libro. Nupay nabayagen, saan a naglumen ti adal a yanninawna. Ikut daytoy ti sikreto ti natalinaay ken naragsak a panagbiag.

Adda maysa nga ama a baknang. Intugotna ti anakna a lalaki iti panagpasiarda iti away tapno ipakitana no kasano ti kinarigat ti biag sadiay. Nga isuda nga agama, nakagasgasatda ta adda aminen kadakuada. Awanen ti pagkunaam iti kasasaadda iti biag.

Nagtalinaedda nga agama iti pamilia ti marigrigat a mannalon. Nagpasiarda iti kataltalonan, kadagiti karayan ken waig. Idi agawiddan iti dakkel a balayda, dinamag ti ama iti anakna: Nakitam no kasano ti kinakurapayda? Ania ti naadalmo, iho?

Insungbat ti anak: Maymaysa ti asotayo idinto nga uppat kadakuada. Addaantayo iti swimming pool ngem addaanda kadagiti karayan ken dissuor. Addaantayo iti lantern iti rabii ngem addaanda kadagiti bituen. Gumatgatangtayo iti kanentayo idinto nga imulmula ken ap-apitenda ti taraonda. Napalawlawantayo iti pader, naimuntar ti CCTV ken adda guardiatayo a mangsalaknib kadatayo idinto nga adu ti gagayyemda. Adu ti encyclopedia-tayo idinto a Biblia kadakuada. Agyamanak, Dad, iti panangipakitam no kasano ti kinapanglawtayo.

Anian a nagpintas a pagpampanunotan aglalo kadagitoy a panawen a bin-ig a dinadaras dagiti gunay. Awan ti mayat a paudi.

Pagdaksanna, adu dagiti maliplipatan nga obligasion wenno aramid a mangitag-ay koma iti ispiritual nga aspeto ti panagbiagtayo.

Nalawag ti ipasimudaag ti estoria. Awan iti kinabaknang ti kinaragsak iti panagbiag. Adda iti kinasimple. Wen, kinasimple.

Simplicity is the essence of happiness, kuna man ‘tay pagsasao.

Iti inaldaw-aldaw, adda dagiti pasamak a mangparpairut iti panagbiagtayo. Isuda dagiti piniduttayo bayat ti pannakigubaltayo tapno adda panilpo iti anges. Dagitoy koma ngarud ti ikkatentayo wenno liklikan a piduten.

Idi maipasngaytayo, nalawag a silalamolamotayo. Awan ti ania man nga imettayo a dimteng ditoy Lubong. Ngem kas nakunan, bayat ti panagdaliasattayo, adu dagiti pasamak, padas a mangtenneb kadatayo. Pagdaksanna, kaaduan kadagitoy ti addaan iti negatibo a bunga iti ilalasattayo ditoy lubong.

Ket dayta kinaragsak, kinatalinaay a sapsapulentayo iti inaldaw, kasla alimukeng a nakaat-atap. Agnanayon latta a sapsapulentayo. Inaldaw a tagiuraytayo a mariknatayo.

Mabalin a nasaludsodmon iti bagim: apay a kasla adda latta kurang iti panagbiagko idinto nga awan sardayna ti panagtrabahok, nasayaat ti panggedak ken magatangko met ti amin a kayatko?

Saan la a siksika ti kasta. Aduda– uray pay dagiti iti panagkitam ket naragsakda. Adutayo, kunak man laengen.

Panawen ngaruden tapno utobentayo ti bagitayo tapno magun-od dayta tartarigagayan a ragsak. Ta ania koma ti mamaay ti agbiag no dim’ man laeng mapadasan ti agragsak? Agmuriot lattan nga agpampanunot kadagiti inaldaw a pakarikutan?

Napnuan stress ita ti inaldaw a panagbiag, wen, agpayso la unay dayta. Agdardarastayo iti amin a banag. Iseserrek man iti eskuela, opisina ken uray pay iti pannaturog. Kasla kayattayo payen a ditay maturog tapno maikamakamtayo laeng iti deadline dagiti rumbeng nga ipasa iti superior/boss-tayo. No palausen ti manarita, pati iti tagainep, agtrabtrabahotayo pay laeng.

Maymaysa ti panggeptayo iti inaldaw: kumita iti dakkel a kantidad para iti pamilia. Agtrabaho iti nalablabes pay ngem iti kabaelan ti bagi.

Ti yanna nga adat, agkapsut met ti bagi. Agrakaya. Marikna laengen nga umet-et dayta tarumpingay. Agliblibas latta ti ragsak a tarigagay.

(Adda tuloyna_