Kinatalged dagiti estudiante iti panawen ti pandemia

Ania ti napatpateg kadagiti umili ita a panawen nga agtultuloy ti panagraira ti Coronavirus 2019 iti Pilipinas ken iti sangalubongan?

Nasken a timbangen a nasayaat ti gobierno ti napatpateg no edukasion wenno seguridad ti salun-at dagiti ubbing ken estudiante no matuloy a manglukatton ti school year inton Agosto 24, 2020.

Indeklarar ni Secretary Leonore Briones ti Department of Education a mangrugi ita nga aldaw, Hunio 1, 2020, ti online registration wenno panagenrol dagiti estudiante iti elementaria ken junior and senior high schools iti intero a Pilipinas. No saan koma a nagraira ti COVID 19, ita nga aldaw koma ti rugi ti klase iti intero a pagilian, ngem naitantanen ti panaglukat iti school year gapu iti agtultuloy a national public health crisis gapu iti COVID 19.

Impasingked ni Presidente Rodrigo Duterte iti panagsaritana iti media nga agingga nga awan iti nasamay a bakuna iti COVID 19 ket saanna nga ipalubos a mapan agbasa dagiti estudiante kadagiti pagadalan tapno malapdan ti pannakaakar dagiti ubbing ken panagraira iti virus.

Iti met panagsarita ni Sec. Briones kalpasan ti kaudian a panagtataripnongda kada Presidente Duterte ken dagiti kameng ti gabinete ken Inter-Agency Task Force on the Emerging Infectious Disease, impaganetgetna ti panangkanunongna ken ni Presidente Duterte a ti kinatalged iti salun-at dagiti ubbing ken mangisursuro ti kangrunaan ken kapatgan nga ikagkagumaanda iti DepEd.

Inlawlawag ni Sec. Briones nga adda panagdudua ken panagamak ti publiko nangruna dagiti nagannak no palubosan wenno ibaonda dagiti annakda a mapan agbasa kabayatan nga agtultuloy pay laeng ti nadagsen a problema iti panagraira ti COVID 19. Impaganetgetna a maulaw ken maamak ti publiko iti rupan-rupa wenno face-to-face learning iti nagbaetan dagiti estudiante ken mangisursuro kadagiti pagadalan.

Pinatalgedan ni Sec. Briones a saan a face-to-face learning ti isayangkat ti DepEd agingga a saan pay a natalged ti agdama a kasasaad ti public health ti pagilian. Impakaammona ti pannakaadaptar ti “distant learning” a nabayagen nga ar-aramiden dagiti adu a kolehio ken unibersidad. Inlawlawagna ti pannakaipakat ti “blended learning” wenno panagusar kadagiti nagtitipon a wagas ti panagadal kas ti panagaramat ti computer internet, online learning babaen kadagiti nagduduma a gadget, panagusar iti radio ken telebision, ken naisagana a modules, tapno dagiti estudiante ket agtalinaedda kadagiti bukodda a pagtaengan kabayatan ti panagadalda.

Praktikal unay ti kapanunotan ni Presidente Duterte a saanna pay nga ipalubos a sumrek nga agbasa dagiti ubbing ken estudiante kabayatan nga awan pay ti bakuna iti COVID 19 ta sigurado a narigat a suroten dagiti adu nga ubbing ken estudiante dagiti maipakpakat a health protocols kas ti nainget a social distancing, panagaruat ti face mask, kanayon a panagugas kadagiti ima ken panagusar iti alcohol ken sanitizers.

Pampanunoten la ketdi ti Presidente nga iti agdama a kasasaad dagiti pasilidad kadagiti pagadalan iti intero a Pilipinas ket agkurang dagiti pasdek a mangokomodar kadagiti estudiante no mapanda agbasa ket maipakat ti social distancing. No agkurang pay dagiti school facilities iti naglabas nga school year nga awan pay ti problema iti COVID 19 ket ad-addan nga agkurang ita no ti maipalubos a laonen ti tunggal classroom ket 15 para kadagiti elementaria ken 20 kadagiti high schools. Narigat pay nga aywanan ken pengdan dagiti ubbing no agkikinnatil ken agaayamda iti uneg dagiti pagadalan.

Maibilang nga “experimental” ti distant learning wenno blended learning nga ibagbaga ni Sec. Briones uray pay nabayagen daytoy a maipakpakat iti kolehio ken kadagiti nagduduma a kurso ta ita pay laeng ti umuna a gundaway a sapasap a maipakat iti pormal a panagadal dagiti ubbing.

Mabalin ti pannakaipakat ti online learning babaen ti computer internet ken dadduma pay a gadget ta adu metten nga ubbing dagiti aginteres kadagitoy a moderno a teknolohia. Ngem kasano ti kaadu dagiti ubbing ken estudiante nga addaan kadagitoy nga alikamen? Nakasagana kadin ti nalawa a paset ti pagilian para ti online learning ket nagadu pay dagiti lugar nga awanan iti signal ken internet connections? Uray dagiti mangisursuro, adu pay laeng kadakuada dagiti saanna unay a kabisado ti agaramat kadagiti computer ken dadduma pay a moderno a gadget.

Isingsingasing pay ti DepEd ti panagaramat ti cellphone kas instrumento ti blended learning ta nasursurok pay ti bilang dagiti cellphone ngem ti kadagupan ti papulasion ti Pilipinas? Ngem masigurado kadi no dagitoy a cellphone ket naiwaras kadagiti indibidual nga umili ta adda pay dagiti Pilipino nga addaan iti dua agingga iti lima a cellphone.

Ibagbaga pay ni Sec. Briones ti panagusar ti blended learning babaen kadagiti telebision ken radio. Ngem kadagiti napanglaw a pamilia ket adu pay laeng kadakuada dagiti awanan kadagitoy nga alikamen. Adu met nga ubbing ken estudiante dagiti saan nga aginteres kadagiti kasta a programa iti radio ken telebision.

Mabalin ti panagusar kadagiti naisaganan a modules kas nabayagen nga us-usaren iti distant learning ngem napaneknekan laeng ti kinaepektibona kadagiti addaanen iti naan-anay a nakem kas kadagiti agad-adal iti kolehio. No adu pay nga estudiante nga ubbing dagiti marigatan a makasursuro no personal a bayabayen ida dagiti mangisursuro, anianto la ketdin no soloenda ti agadal ken agdependerda laeng kadagiti maipatulod a modules.

Maibilang ti edukasion a kapatgan a gameng ti tunggal tao, ken kalkaliguman dagiti amin a nagannak a maisagutan dagiti annakda iti adal tapno agbalinda a nasaysayaat a tao ken naranraniagto ti masakbayanda. Nakasaysayang ti panawen no agsardeng dagiti ubbing ken agtutubo nga agadal iti adu a bulan wenno nabaybayag pay.

Kasapulan a panunoten a nasayaat dagiti opisial ti gobierno ti mayanatup a sulosion tapno saan a sumardeng ti panagadal dagiti estudiante ken saan met nga agpeggad ti salun-atda ita a panawen nga agraraira ti mapagam-amkan a virus.