Kinder pupil, dinungpar ti dump truck, natay

BANTAY, Ilocos Sur – Saanen a naikamakam ti biag ti maysa a kinder pupil iti ospital kalpasan a dinungpar ken pinilidan ti maysa a mini dump truck iti national highway a sakup ti Barangay Balaleng ditoy nga ili idi malem ti Pebrero 12.

Adda ita iti kustodia ti police station ditoy ni Jimmy Ibe y Sarabia, 34, naasawaan, ken residente iti Barangay Paratong, Sinait, ken drayber iti Isuzu mini dump truck a nakadungpar ken nakaatal ken ni Daxen Zephyr Pacpaco y Cardenas, 6.

Naammuan ken ni Roberto Pacpaco y Pizarro, lolo ti biktima, nga agbalballasiw ti ubing iti highway nga agpadaya a direksion idi dinungpar ken pinilidan ti agpaabagatan a dump truck a minaneho ni Ibe.

Naitaray ti biktima iti Metro Vigan Cooperative Hospital, Bantay, Ilocos Sur, ngem indeklara ti doktor a nangtaming kenkuana a dead on arrival.#