sinursuran-banner-sqSinursuranNi Jobert M. Pacnis

Kitaem ti Ipaunegmo, Balong!

Sinursuran: Kolum ni Jobert M. Pacnis
(Tuloyna)

Naipakat ti imbestigasion iti napasamak. Naduktalan a nai-repacked laeng dagiti durian candy nga inlako dagiti lallaki. Kayatna a sawen, nagusarda iti nagan ti maysa nga agparpartuat ti nasao a klase ti kendi—daytay addan naganna iti merkado. Daytay am-ammon ti produktoda a nalaka a malako.

Idi maala ti palawag dagiti adda iti likudan ti nasao nga agparpartuat iti lehitimo a durian candy, kinunada a dida produkto ti nakasabidong kadagiti ubbing. Nadalus kano ti pagar-aramidanda. Naaramat laeng ti “naganda” ta inusar dagiti suspek ti label ti tagilakoda iti bukodda a gagem— a mabalin kano pay nga adda dakkel a tao iti likudan daytoy tapno madadaelda ket iti kasta agsuek ti negosioda. Apaman a mapasamak daytoy, dayta adda iti likudan ti nangisit a panggep, ipamaysananto metten ti agnegosio ta awanen ti dakkel a kakompetensiana.

Saan a karkardayo dagitoy kastoy a pasamak. Iti laengen aglawlawtayo, iti bukodtayo a paggargarawan, addada maal-alimadamadtayo a kaarngi ti daytoy a pasamak. No dumurdur-as ti bassit a negosio a banana cue ni Maria ta adda iti pusona ti panaglutoluto, pagammuan lattan ta adda tumpuar nga isyu a mangdadael iti tagilakona. Maikannawag a saan a nadalus ti paglutlutuanna wenno adda nagsakit ti tianna a nangan iti banana cue-na. Nga aramid ti kakompetensiana.

Ti kastoy nga aramid ti maysa nga ikkatentayo koma. Crab mentality. No pumangato ti maysa, adda dita nga ikarigatantayo met nga ipababa. Ania ngata no kitaentayo iti sabali nga anggulo? A ni kappi dina guyoden nga ipababa ti kaduana no di ket makisinnaranay a mangingato kadaytoy tapno makaruar iti nakaibaludanda a lata wenno planggana. Ket inton makaruar ti tinulonganda, mabalin a daytoyto met ti mangtulong kadakuada a makalibas wenno agbiag a siwawayawaya ken siraragsak.

Adu pay, kas nasaon, dagiti simmaruno a food poisoning a napasamak a kaaduan nga iti maysa a pagadalan. Ngem pagyamyamanan ketdi ta iti kaadu daytoy nagsasaruno a pagteng, awan ti naipatli, naisakripisio nga arapaap.

Ngem ti kadaksan, isu dagiti nagbalin a biktima ti pannakasabidong iti naipaunegda a shake. Minuto laeng ti limbes idi maipauneg daytoy dagiti agnobio idi makariknada iti panagulaw ken panagbaliktad dagiti rusokda.

Naitarayda a dagus iti ospital ngem saandan a nakalasat pay. Kayatna a sawen, napigsa ti sabidong a naipaunegda. Ket ditan a nagpatingga dagiti namaris nga arapaapda.

Nagkas-ang a pasamak!

Ket dagitoy ti ditayo koma kayat a mapasamak kadagiti annaktayo nga adda pay met iti uneg ti pagadalan. Namnamaen nga addada iti nasayaat a dakulap no kasta nga addada iti eskuela. Ngem anian, aya, ta adda latta peggad a nakalayat kadakuada iti benneg ti taraon.

Ti sibubukel a pagadalan, dakkel unay ti akemna ditoy. Rumbeng a kitaenna ti pagimbagan ti ania man nga ubing a naitalek kenkuana. Siguraduenna a saan a maisagmak ti ubing kabayatan nga adda iti ikubna.

Isu ngarud nga adda bilin, mandato ti Departamento ti Edukasion maipanggep kadagiti taraon a maididiaya iti uneg ti pagadalan. Sagudayen daytoy ti pannakasigurado koma ti kinatalged dagiti taraon a magatang iti kantina ti pagadalan. Ken awan koma pay ti aglako iti softdrink ken tsitsiria ( a di met masursurot) iti uneg.

No adda met sumrek a tagilako manipud iti ruar, wenno adda agpuesto iti sango ti pagadalan, masapul nga addaan dagitoy iti sanitary permit. Karbengan ti pagadalan a di paglakuen ti asino man nga awanan iti permit.

Ta isunto met laeng ti agsungbat no adda maisagmak nga ubing gapu laeng iti taraon nga impaunegna!

Kadagiti met nagannak, no saan a sigurado ti kanen ti anak, ania ngata no ilutuan laeng dagitoy iti balonda ta siento porsiento pay nga ammotayo a nadalus ti pannakaisaganana?

Ayna, narigat ti agbalin a biktima ti food poisoning!

Pada a nagannak, kitentayo koma ngarud dagiti annaktayo. Masapul met a makibadangtayo kadagiti pagadalanda tapno masierto ti pannakaipatungpal ti mandato mainaig iti taraon.

Ditayo met a liwayan ti mangipalagip kadagiti annaktayo: Kitaem ti ipaunegmo, Balong. Annadam ti salun-atmo.

Ta iti udina, isuda dagiti di magatadan a gamengtayo.#