sinursuran-banner-sqSinursuranNi Jobert M. Pacnis

Kitaem ti Ipaunegmo, Balong!

Sinursuran: Kolum ni Jobert M. Pacnis
(Umuna iti dua a paset)

AGAS man ti sakit ti tian, mam… maysa idi kadagiti ubbingmi ti immay iti office.

Apay? nasaludsod ti kaduami.

Agsakit ti tian da… ken innagananna dagiti dua a kaklasena.

Saanda, aya, a nag-break ket kalkalpas ti breaktime?

Amman, mam. Iskrambol pay ngarud ‘diay pinagpalamiisda itay.

Nangalaanda iti iskrambol?

Adda itay immay nagpuesto dita sirok ti barakbak, mam.

Ti kayo iti sango ti ruangan ti old site ti kayatna a sawen– a mapagnaan pay no mapanka iti new site nga agduapulo metro ti kaadayona iti laud. Ditoy ti paggugusto dagiti aglakolako iti eskrim, iskrambol a pagtambayan no kasta a mapanda aglako iti baybay (agtallopulo iti amianan ti pagadalan) a yan dagiti makipagsang-at kadagiti napan nagsigay; ken kumprador. Napariir ngamin ditoy ken nalinong.

Pagammuan, adda manen immay dimmawat iti agas ti tian iti office kalpasan a nakapanaw ti immuna. Saandan sa met a mammammigat ngamin, nakunak iti nakemko. Segun kadagiti kakaduak iti pagadalan, ta agdadamoak, adu kadagiti ubbingmi ti saan a mammammigat gapu iti kaadayo dagiti paggapuanda. Ngamin, no saandan a maabotan dagiti barangay a mangidammang kadakuada iti karayan, awanton ti mapaglugananda. Kapilitan nga aglanganda.

Sagmamano laeng a minuto, addan nabukel nga istoria. Aggagayyem dagiti agsakit ti tianna. Agpapadada a gimmatang iti iskrambol iti limmabas nga aglako iti sango ti pagadalanmi. Nabalinanda ti gimmatang kadagiti outsider ta malabsanda iti panaggapuda iti new site no mapanda it kantina iti old site.

Rimmuar ti bersion dagiti biktima. Idi kan’ iblender ti aglako ti ginadgadna a yelo, medio nataldiapanda a kasla adda tsokolate nga agar-aruyot kadagiti landok a pagkiwar dagiti aglako. Impatoda kano a tsokolate daytoy. Ngem idi ramananda ti ginatangda, kasla kano adda naangot/naramanda a kasla grasa. Ngem dida inkankano ta nakapudpudot ket kayatda ti mapreskuan.

Ngem ketdi, imbelleng ti maysa kadakuada ti saanna pay a nagudua nga iskrambol idinto nga intuloy a kinnan ti maikadua ken maikatlo (a dagitoy ti napakaruan a nagsakit ti tianda). Ket iti dayta a leppas ti oras ti break kabayatan ti panagur-urayda iti titserda, nagsakit kano lattan dagiti tianda. Sangsangkamaysada a nangitudo a ti nakanda nga iskrambol ti makagapu. Ngem ania pay ti kamatenmi ket nakapanawen ti naglako?

Naimbag la ketdi ta saan a napakaruan dagiti ubbingmi. Naala pay laeng iti kadawyan, ordinario nga agas ti pannakasabidongda iti taraon nga impaunegda.

Maipalagip daytoy a kapadasanmi gapu itoy nagsasaruno a food poisoning a napasamak kadagiti nadumaduma a pagadalan iti pagilian. Saan laeng a maymaysa a kaso, wenno dua, wenno tallo, wenno uppat… adu!

Nagsasaruno pay ketdi. Nangrugi iti probinsia ti Davao a no sadino, nakakaan dagiti ubbing a biktima iti durian candy manipud kadagiti lallaki a napan iti pagadalanda. Naasian kano dagiti ubbing, nalabit a dagiti payen mannursuro isu a pinastrekda dagitoy, kadagitoy nga agtagilako ta kunada nga agad-adalda iti kolehio ket maysa daytoy a wagasda a makapataud iti allowance-da.

Ket napasamak ti di rumbeng. Nagsasaruno a nagsakit ti tian dagiti ubbing a nakaitarayanda iti ospital. Ginasutda a biktima.

Pagsayaatanna, awan ti naireport a natay. Nakaruarda met laeng iti ospital kalpasan a naipaagasda a naka-confine-an pay dagiti agtallopulo a napakaruan a biktima.

(Adda tuloyna)