Kitaenda koma nga Umuna ti Akemda

Kolum ni Jobert M. Pacnis

(Umuna a paset)

NARIGAT la koma a suraten daytoy ta pasettayo iti sistema.

Ngem adda dayta akem ti mannurat a dinto maikkat iti kinataona. Saanna a mabalin ti agulimek lattan kadagiti isyu a makitkitana. Maitutop laeng a suratenna, irakurakna ti kinapudno.

Narisgo nga akem. Iti panangibutaktak iti kinapudno, saan a di adda dagiti madalapus a mabalin a dagi-toy ti mangted-peggad iti biag. Nupay kasta, dinto agngudeng ni mannurat a mangsurat iti kinapudno— a kangrunaan nga akemna.

Malagipko la ket ngarud manen ti napalabas.

Adda idi sinurattayo a sarita a naipablaak iti Bannawag. Maipanggep daytoy iti kabibiag dagiti estudiante aglalo dagiti dandanin agturpos a masapul nga ag-OJT-da.

Ti bida iti istoria, maysa nga electronics engineering student. Nag-OJT, kaduana dagiti sumagmamano a kaa-dalanna, iti maysa a cable TV. Nabingayda nga agkakaadalan iti tallo a grupo. Ti umuna, agtalinaed iti headend (yan dagiti nadumaduma nga equipments) ket imonitorda no adda panagpalia dagitoy; ti maika-dua, sumurot kadagiti ag-field a lineman (nga idauluan ti maysa a system engineer) tapno agtarimaan kadagiti linia wenno ania man nga itawag dagiti subscribers; ken ti maikatlo, sumurot kadagiti reporter (ta adda met bassit programa dayta a cable TV) ken videographer tapno tumulong kadagiti aramid a teknikal.

Iti sarita, naiparang ti naannayas a taray ti panag-OJT. Kasta metten dagiti parikut kas koma kadagiti subscribers a naunget, dagiti agtatakaw iti signal; babassit a ragsak kas koma iti kaadda latta ti merienda a sanguen no kasta a natarimaanen ti signal ti balay a yan ti job order. Ken no mamalman, masipngetan iti panagtarimaan, saan a dida dumagas kadagiti pagiinuman sakbay nga agsublida iti opisina tapno maigarahe dagiti lugan.

Alagaden ti opisina a libre ti umuna a sangapulo a metro a cable wire kadagiti agpa-connect. No agkurangto pay, daytanto laeng pagkuranganna ti mabayadan ti tunggal metro. Ti dakes, ideklara dagiti linemen ken ti system engineer a di nagsobra ti impanda iti sangapulo a metro ti inwaywayda a linia. Antagayam, ti masingirda a bayad ti sobra iti sangapulo a metro, isu ti us-usarenda nga agiinum (nga iparit pay ti opisina).

Ket dagitoy ti nasiiman ti bida. Idi madanon ti pannakaited ti gradoda a nag-OJT, kinasarita ida nga immuna ti akimbagi iti cable TV. Nagsalsaludsod daytoy no kasano ti kababalin dagiti empleadona. Awan ti inlibakna banag a nangemkeman dagiti kaada-lanna idi rummuardan iti pasdek. Baka kano pagpu-pungtotan ida ti system engineer ket ibabana ti gradoda a maited iti kamal-manna.

Iti udi ti sarita, naklaat laengen ti bida ta isu ti kangatuan iti grado.

Gapu kadayta a sarita, nagreklamo ti system engineer a nang-supervise iti OJT-tayo. Kunana a dinada-elko kano ti naganna ta awan kanon ti sabali nga ibagbagak iti sarita no di isuna. Nangipila iti reklamo: libel.

Damok dayta a maireklamo. Kapilitan a nag-counter affidavit-ak. Ditoy, inlanadko a fiction (bunga ti panunot) laeng ti sarita. Ken maysa, dinanakita ti twist ti sarita iti udina. Naitalimudok lattan ti panagkitana iti sarita iti panagbarbartekda ken panaglakoda kadagiti sobra ti cable wire.

Nalawag iti ngudo ti sarita, inikkan ti system engineer iti nangato a grado ti bida. Kayatna a sawen, nakapasa iti pannubok ti OJT. Dagiti panagin-inumda ken saan kan’ pay idi a panageremit iti bayad ti sobra a linia, maysa laeng a pannubok kadagiti OJT. Ammo daytoy ti sibubukel nga opisina. In-set-up-da ti pannubok. No saan a kasta, nababa koma ti grado ti bida nga OJT a kakaisuna a nagsao iti kinapudno ta adda met pay panawen ti system engineer nga aramiden a kasta kalpasan a kinompronta koma ti akinkukua iti cable. Ngem awan ti panangsalangad a napasamak ta kas nasaon, ammon ti sibubukel nga opisina dagiti aramiden dagiti linemen ken system engineer kas paset ti pannubokda kadagiti OJT.

Pagsayaatanna, saanen a rimmaba daydi a reklamo. Nakita la ketdi dagiti maseknan nga awan ti napigsa a pagbasaran ti reklamo nga agbalin koma a kaso.

Ket napalaus a panagyamanko kadagiti timmulong tapno malusotak dayta a krisis iti kinamannuratko.

(Adda tuloyna)