Banner News: Klase dagiti pagadalan, nasuspende iti I.Sur; COVID-19 precautionary measures, maipakat | Tawid News Magazine - Weekly Ilocos News 📰

Klase dagiti pagadalan, nasuspende iti I.Sur; COVID-19 precautionary measures, maipakat

VIGAN CITY — TAPNO malapdan ti posible a pannakaakar ken panagraira ti mapagam-amkan a coronavirus disease 2019 (COVID-19) iti Ilocos Sur, imbilin ni Governor Ryan Luis Singson ti pannakasuspender iti nasurok a makabulan ti klase dagiti estudiante kadagiti pang-publiko ken pribado a pagadalan, manipud idi Marso 13, 2020 agingga inton Abril 12, 2020.

Immandar pay ni Gov. Singson ti pannakaipakat dagiti nagduduma a preventive measures agraman ti nainget a pannakaipakat ti 14 days quarantine kadagiti bumisita ken agawid iti Ilocos Sur a naggapu kadagiti pagilian ken lugar nga addaanen iti positibo iti COVID-19.

Nayetnag ti pammilin babaen ti Executive Order No. 12 kalpasan ti panangiparuar ti Interagency Task Force for the Management of the Emergence of Infection Disease iti Resolution No. 11 Series of 2020 idi Marso 12, 2020 a nangingato iti Code Alert System ti COVID-19 Public Health Event iti Code Red Sublevel 2 iti intero a pagilian.

Inyetnag ni Gov. Singson ti Executive Order kalpasan ti pannakitaripnongna kadagiti kameng ti Provincial Board, local chief executives, Provincial Health Office, Department of Health, Department of Interior and Local Government, Department of Education, Department of Trade and Industry, Philippine National Police ken dadduma pay nga stakeholders maipapan kadagiti addang a maipakat tapno malapdan ti idadanon ken panagsaknap ti COVID-19 iti Ilocos Sur.

Mairaman kadagiti dadduma pay a preventive measures iti Ilocos Sur ket ti nasapsapa a pannakaisayangkat dagiti graduation and moving up ceremonies kadagiti pagadalan; pannakaisanud wenno pannakakansel dagiti piesta iti ili ken barangay ken dadduma pay a social gatherings; pannakaisardeng pay laeng dagiti miting ken panagraragup dagiti tattao;  panagaramat iti alcohol, sanitizers ken dadduma pay a disinfectant kadagiti sumrek kadagiti publiko ken pribado nga opisina ken eskuela; panagusar iti thermal scanning kadagiti pasdek; ken panangliklik pay laeng ti “body contact” kadagiti pasken.

Naimandar pay ti pannakaaramid ken pannakaipakat dagiti umno a protocol iti panag-report maipapan iti COVID-19. Naibilin pay laeng ti pannakaiserra ti panagpabuya ti dancing fountain iti Plaza Salcedo.

Iti mainaig a damag, inrakurak ni Dr. Carmelisa Singson, Provincial Health Officer, kabayatan ti naangay a press conference iti Provincial Capitol, a nakasagana ti isolation facilities ti Gabriela Silang General Hospital a pang-quarantine kadagiti addaan iti simtomas a naggapu kadagiti lugar nga addan positibo iti COVID – 19.

Naammuan a naimandaren kadagiti mayor a paggarawenda dagiti opisial ti barangay agraman dagiti barangay volunteer workers kas kadagiti barangay health workers, barangay nutrition scholars ken barangay service point officers ti nainget a panag-monitorda kadagiti agsangpet iti barangayda manipud ballasiw-taaw ken kadagiti lugar nga addaanen iti positibo ti COVID-19 nga ireportda iti City/Municipal Health Office, ken bilinan nga agdalanda iti self-quarantine iti 14 days uray no awananda iti simtomas. ●