Kobrador ti hueteng, tiniliw dagiti polis

SINAIT, Ilocos Sur Inaresto dagiti nagtitipon nga elemento ti polis ditoy ken ti Ilocos Sur Provincial Police Office nga indauluan ni OIC Police Supt. Noel Baguitan Amoyen ken ti CIDT nga indauluan ni PCI Arbel Mercullo ti dua a kobrador ti hueteng bayat ti panagkolektada iti pusta idi aldaw ti Disiembre 5.

Nabigbig dagiti kobrador ti hueteng a da Michael dela Cruz y Sapor, 22, baro, ken residente iti Barangay Cabarambanan ditoy nga ili ken Apolinario Yanig y Vergara, 22, baro, ken residente iti Barangay Sta. Cruz ditoy met laeng nga ili a tiniliw dagiti polis bayat ti panagkolektada iti pusta iti hueteng iti abaga ti national highway a sakup ti Barangay Sta. Cruz.

Nakumpiska iti ikut dagiti dua dagiti polieto a nakailanadan dagiti napustaan a numero, ballpen, ken pusta iti nadumaduma a denominasion nga agdagup iti P256.00.

Mapapati nga iti Badoc, Ilocos Norte ti pakabolbolaan dagiti numero.

Naipan dagiti suspek agraman dagiti nakumpiska kadakuada iti Sinait police station para iti maikanatad a disposision.#