Koleksion ti tiendaan ti Candon, ngimmato

CANDON CITY – Nangatngato ti koleksion ti tiendaan ditoy iti P.6 milion ita a tawen no maikumpara iti nakolektana idi napalabas a tawen.

Kinuna ni Odette De Guia, market consultant, nga immabut iti P4,3000,000 ti nasingir iti tiendaan ita a tawen idinto a P3,700,000 laeng idi 2010 wenno nangatngato iti P600,000.00.

Segun pay ken ni De Guia, itay laeng Disiembre, nakakolekta ti tiendaan iti P608,805.00, ad-adayo nga amang ngem ti nakolektana idi 2010 a P300,000.00 laeng.

Maikadua a kangatuan ti koleksion ti bulan ti Nobiembre nga immabot iti P400,000.

Maipalagip a manipud Nobiembre 20, 2011, nainget nga impatungpal ti market administration ti pannakaipan ti amin a market vendor iti wet market section manipud iti paglaklakuanda a kalsada iti likudan ti public market.

Kinuna ni De Guia, Market a namnamaenda nga ad-adunto manen ti makolekta iti wet market a maawaganto iti Farmer’s Market gapu ta mapalawa ti areana babaen ti pannakagatang ti lote nga adda iti aglawlawna.#