sinursuran-banner-sqSinursuranNi Jobert M. Pacnis

Kolum : Sinursuran

Ti Terorismo

(Umuna a paset)

 

 

 

ITI pakasaritaan, saanen a baro a konsepto/pasamak daytoy terorismo nga aramid. Idi pay laeng punganay, kadagiti rimtab a sibilisasion, normalen ti panaglalabanda tapno maibayogda ti bukodda nga iturayan. Normalen ti panagsakup a kakuyog ti pammutbuteng. Ket kabulbulig dagitoy ti pannakairamraman dagiti inosente. Ngem ketdi, kadagidi a panawen, saan pay nga am-ammo ti balikas a terorismo a mayaplikar kadagitoy a pagteng. Ita, nagbalinen a sangalubongan nga isyo daytoy. Ngem ania kadi daytoy terorismo a makunkuna?

Maysa daytoy nga aramid a mangitantandudo iti radikal wenno rebolusionario a panggep babaen ti nariribuk nga addang.

Segun iti Human Security Act of 2007, pakaibilangan ti terorismo nga aramid ti panagpirata/panagsaed iti baybay tapno alaan dagiti biktima iti sanikua ken mabalin a dayaw ken biag, panagkidnap, panag-hijack, panagpatay, rebelion/kudeta, dagiti krimen nga adda pannakainaigna iti panagdadael (sanikua wenno biag) ken panagpuor (arson).

Nagbalin a nakallalagip iti pakasaritaan ti napasamak a pannakabomba ti World Trade Center idiay New York idi September 11, 2001. Rinibu nga umili ti naipatli gapu kadayta a nakaam-ames a pasamak. Dinayyegna ti sangalubongan. Kasano a napasamak dayta pannaka-hijack ti dua nga eroplano nga isu ti namanipolar a nangdungpar iti nasao a pasdek idinto nga am-ammo ti Amerika a kamodernoan ken kabilegan a nasion iti lubong? Di nakappapati. Ngem napasamak, pudpudno a pasamak!

Am-ammo itan daytoy a kas 9-11 Attack.

Simngay la ket ti saludsod no kasano katalged ti agnaed iti maysa a pagilian. No linaklaka dagitoy a terorista a pinagkintayeg ti kabilgan a pagilian iti lubong, anianto laengen kadagiti babassit?

Ta apay ngamin nga addada dagitoy a terorista a mangisaysayangkat iti kastoy nga aramid? Ania ti gamgamgamenda kadagitoy nga addangda?

Numero uno a rason ti panangagawda iti bileg kadagiti nadumaduma a nasion. Inton adda kadakuadan dayta a bileg, makapagturayda ket maaramidda ti kaykayatda a mangakas iti amin a kinabaknang ti lubong. Agrennekda iti ay-ayatda.

Sabali pay a rason ti panagibales. Iti pakasaritaan, addan dagiti naisayangkat a terorismo gapu ta kayat dagiti terorista a balsen dagiti nasion/gobierno a nakadungpar iti riknada wenno iti bukodda panagem.

Ti dakesna, ania man kadagitoy ti rason, adu a biag ti maibubuis uray dagiti inosente.

Maibilang a terorismo nga aramid ti mapaspasamak ita (kabayatan a masursurat daytoy) iti siudad ti Zamboanga. Nakakaasi dagiti mairamraman nga inosente nga umili. Maluyaanka pay nga agbuya kadagiti mapaspasamak a panagtartaray dagiti ubbing (kaduada dagiti ipatpategda iti biag) a maip-ipit iti pagbabakalan. Isuda nga aglalang-ay koma iti sirok dagiti kaykayo tapno nanamenda ti ragsak ti kinaubing, addada a makilinlinnemmengan iti bala. Adda payen daksanggasat a nakettel ti naranga koma a biagda gapu kadaytoy a riribuk.

Aglalaok ti rumrumuar a rason no apay a napasamak daytoy. Agpinpinnabasol ti agsumbangir a partido (gobierno ken ti grupo dagiti MNLF). Ngem ti nalawag ditoy, pinarnuayna ti panagbuteng iti panunot dagiti umili. Kasta metten ti batibat kadagiti ubbing. Ania, aya, ti nagan ti ilablaban a kalintegan no dagiti inosente ti maidatdaton iti pagbabakalan?

(Adda tuloyna)