Kombension ti OFCC, maangay inton Hunio 12

Honolulu, Hawaii – Aganay sangagasut ket tallupulo a delegado ti manamnama nga agatendar iti tinawen a kombension ti Oahu Filipino Community Council (OFCC) a maangay iti Philippine Consulate Lanai ditoy inton Hunio 12.

Ibagian dagitoy a delegado dagiti aganay 50 a unit organizations a kameng ti konseho.

Addaan iti tema nga “Ideas to Action to Achievements”, manamnama a mapagpapatangan bayat ti kombension dagiti topiko a kangrunaan a pakaseknan dagiti Filipino iti Hawaii a pakairamanan ti imigrasion, edukasion, trabaho, gobierno, politika, ekonomia, salun-at ken dadduma pay.

Maangay pay bayat ti kombension ti nominasion ken eleksion a pannakapili dagiti baro nga opisial ken direktor ti OFCC.

Ni Consul General Leoncio Cardenas, Jr., ti naawis a mamagsapata kadagiti mabutosan.

Ni Maria Etrata ti agdama a presidente ti OFCC. Kameng ti OFCC iti United Filipino Council, ti statewide umbrella organization a buklen ti aganay 120 a gunglo.#