Footer

KOMENTARIO: Ballaag ti mabbatanen a reserba ti lana iti sangalubongan (Tuloyna)

Kangrunaan a motibo ti panangipasdek dagitoy a pagilian iti OPEC ti panangkontrolda iti presio ti petroleum. Ngem saan nga inayonan dagiti dadduma pay nga exporting countries a kas iti Egypt, Mexico, Oman, China, Malaysia ken Colombia daytoy panggep ti OPEC. Dagitoy a saan a kameng iti OPEC dagiti kangrunaan a players iti panaglakuan idinto ta kontrolado laeng dagiti OPEC members ti produksion ken lako.

Dimteng ti peak production dagiti kangrunaan a players a non-OPEC members. Kiddawenda itan ti ingangato ti produksion ti OPEC members. Mayat ti OPEC nga ingato ti produksionda ngem iti nanginngina a presio. Agsipud ta bassiten ti reserves dagiti non-OPEC members, kapilitan nga immannugotda ket inkapilitan a gumatang ti sangalubongan iti nangina a presio nga agtaud kadagiti OPEC members.

Iti panagpaso ti peak reserves ti lana dagiti non-OPEC members, inkabassitda ti produksionda tapno matimbeng ti panaglakoda. Agpaay laengen iti kasapulanda ti dakkel nga ilgat ti nabatbati kadagiti reserbada a lana.

Bassit laeng nga ilgat ti produksionda ti agpaay iti merkado. Daytoy ti rason a kadagiti naglabas a dekada nalaka pay laeng dagiti produkto ti petroleum. Ngem itan, awanen dagidi a panawen a nalaka ti gagatangen a petroleum ta agtaud a mismon kadagiti OPEC members ti dakkel a reserves a para lako iti merkado. Ngem ti makapadakes, ilakoda  dagitoy a reserves iti presio a kayatda iti merkado. Isu a nanginan dagiti produkto ti petroleum a kas iti gasolina, krudo ken dadduma pay.

Protektaran dagitoy oil producing countries ti reserbada iti lana para iti bukodda nga usar. Isu a kalpasan daytoy a tawen, mariknan ti yiirut ti produksion ti petroleum. Saan a masasaan a nasken nga alimonen dagiti pagilian nga agdepdepende unay iti lana ti nangato a presio no kayatda a saan a napaspas nga agsuek ti ekonomiada. Dakkel la ketdi ti ited ti nangato unay a presio ti lana a komplikasion iti ekonomia dagitoy a nasion nga agdepende laeng iti lako a petroleum iti merkado a pakaibilangan dagiti third world countries  a kas toy pagiliantayo.

Nariknatayon iti napalabas ti rigat a pinataud ti nangina unay ti presiona a produkto ti petroleo. Adu a pagilian ti nagsuek ti ekonomiada gapu iti nangina unay a gatangenda a petroleo nga aramatenda iti pannakaipataray dagiti planta, negosio ken iti inaldaw a panagbiag dagiti umili. No nangato unay ti presio ti petroleo, nasipnget ti masakbayan dagiti pagilian nga agdepdepende unay kadagiti produkto ti petroleo. Ngem ad-adda pay a nalidem ti senario no dumteng ti panawen nga aggiinnagawen dagiti pagilian iti nakiddit a lako a produkto ti petroleo. Dakkel pay ti posibilidadna a rauten dagiti dadakkel a pagilian dagiti oil producing countries tapno laeng agtuloy ti panagtaray dagiti pamastrekanna. Iti moderno a panawen, posible a daytoy ti puon ti pakaungawan ti lubong!

Bimmassiten dagiti para lako iti merkado a produksion. Ket dumtengto ti aldaw a naibuston amin a reserves iti sangalubongan. No adda nabatbati, bukod nga usar laengen dagiti addaan oil reserves.

Daytoy ita ti dakkel a ballaag a nasken a masolusion sakbay a dumteng dayta a panawen nga awanen ti tagilako.

(Adda tuloyna)