KOMENTARIO: Barangay ken SK elections, sagana ti Comelec nga ingget kusel (Maikadua a paset)

Ibatadmi a saan a dagiti pammapatay nga insayangkat dagiti armado a tattao, dagiti pammutbuteng, panaggatang iti butos, panagkaradap iti butos ti namagbalin daytoy nga eleksion a nakiro.

Makunami pay a saan a dagiti lokal nga opisial ti Comelec ti pangidas-alanmi iti pammabalaw ken pammabasol gapu iti saan a nasayud a pannakaisayangkat ti eleksion. Dayawenmi ketdi ta naanus dagiti mangisursuro ta uray kasta unay ti kaadu ti trabahuenda iti kaaldawan ti panagbubutos, inaramidda ti amin a kabaelanda tapno nasayud ti panagpipili. Rumbeng pay ketdi koma a mabirngasanda iti Maestro Anus gapu ta agul-ulimekda lattan iti kabassit ti honorariumda iti baet ti kadagsen ti annongenda ken iti pannakapabpabasolda a nagliway iti trabahoda a di met isuda ti nagaramid.

Apay ngarud nga ingget kiro ti eleksion? No inaramid dagiti kapolisan ti pagrebbenganda, no inaramid dagiti mangisursuro ti naipabaklayda kadakuada nga annongen, apay a nakiro ti eleksion?

Ti sungbat, gayyem: kinain-episiente dagiti dadaulo daytoy nga ahensia a nakaipabaklayan ti pannakaisayangkat iti natalna, naurnos ken nadalus nga eleksion.

Ibinsabinsatayo dagiti kapaliiwantayo.

Idi pay la kalkalpas ti eleksion nasional, nagbalinen a napudot a tungtongan no matuloy a maangay ti barangay ken SK elections. Kinapudnona, adu dagiti saan a pabor a matuloy ti nasao nga eleksion agsipud iti kaasidegna iti nasional nga eleksion a naangay idi Mayo 10, 2010. Malaksid dayta, dakkel ti depisit ti budget da dinanon ni Presidente Benigno Aquino III nga immabut iti P165 bilion ket gapu iti daytoy indagadag ti sumagmamano a senador a maisanud ti eleksion iti 2011.

Nangipila pay ni Sen. Jose Zubiri iti gakat a maisanud ti eleksion iti October 2012 tapno makainut ti gobierno.  Aganay a P4 bilion ti mapattapatta a mabusbos ti gobierno iti pannakaisayangkat ti eleksion.

Adu met nga agilinlinteg iti Kamara ti nangidagadag a maitantan ti eleksion gapu met iti kadakkel ti gatad a kasapulan iti sanguanan ti kakiddit ti pondo a dinanon ti kabarbaro nga administrasion ni Pres. Aquino. Pabor idi damo ni Vice Pres. Jejomar Binay ken Senate President Juan Ponce Enrile a maisanud ti barangay ken SK elections.

Uray ni House Speaker Feliciano Belmonte kanunonganna idi damo ti pagtaktakderan da Binay ken Enrile ngem idi imbatad ti Presidente a maituloy ti eleksion, nagbaw-ing iti posision ket pimmabor a maituloy ti eleksion.

Kabayatan ti panagginginnuyod ti pabor ken kontra iti pannakaangay ti barangay ken SK elections, impatalged ti Comelec nga agsagsaganan nga isayangkatna ti eleksion iti Oktubre 25, 2010.

Daytoy ti masansan a sangkapatalged ti Comelec: nakasaganada uray ania ti agbalin a pangngeddeng ti Kongreso ken ti Presidente. Yan ti rigatna, intedda ti impression nga awan ti problema iti pannakaisayangkat ti eleksion iti baet ti pannagna ti tiempo bayat ti saan a panagsinnurot dagiti turayen no matuloy ti eleksion wenno saan.

“Itedyo iti kabiitan a panawen ti signal agsipud ta kabayatanna, agsagsaganakami para iti eleksion ket dimi kayat ti agbusbos iti saan a kasapulan tapno laeng maitantan ti eleksion,” kinuna pay ni Comelec Chairman Melo.

Imbatad mismo ni Pres. Aquino ti pannakadismayana iti adda kunkunana a panagsagana ti Comelec para iti barangay ken SK elections.

“Kasano a mapnekka ket no maikumpara iti automated elections, medio nasimsimple daytoy nga eleksion?” nakuna ti Presidente sana inyunay-unay nga intuding met ti linteg ti petsa a pannakaangay ti eleksion, rumbeng koma a nabayagen a sinaganaan ti Comelec.

Kas reaksionna, impalawag ti Comelec a nataktak ti pannakaideliber dagiti election paraphernalia agspud ta naladaw ti pannakabuangay ti bidding committee, saan a nasayaat ti panagtrabaho ti National Printing Office a nangimprenta kadagiti opisial a balota, nagsagrap iti flat tire dagiti delivery trucks, ken dadduma pay a rason.

Ngem annugoten man wenno saan dagiti opisial ti Comelec, makunami nga adda panagkamtud ken panagliwayda iti baet dagiti sangkapatalgedda nga agsagsaganada para iti pannakaangay ti barangay ken SK elections.

Iti nalawlawag a pannao: nagluto ti Comelec ngem nakusel ti linutoda nga indasarda kadagiti botante.#