Komentario. Conditional cash transfer, agbalin a padagsen kadagiti umili? (Umuna a paset)

Makapariribuk-nakem ti impalgak itay nabiit ni Baguio City Mayor Mauricio Domogan nga adda dagiti benepisario ti conditional cash transfer a saan a rumbeng a nairaman iti listaan agsipud ta adda met kabaelanda iti biag.

Adda pamkuatan ni Mayor Domogan a mangibaga a dakkel a pakapaayan ti 4Ps a manggun-od iti pudpudno a panggepna ti naduktalan ti gobierno ti siudad nga idauluanna babaen ti City Social Welfare and Development Office nga aganay 100 kadagiti 500 a benepisario ti conditional cash transfer iti siudad ti Baguio ti saan met a kakurapayan kadagiti nakurapay gapu ta maibilang dagitoy nga adda mabalinda iti pudpudno a biag.

Segun iti mayor, sumagmamano kadagitoy ti addaan kadagiti taksi ken agtagikua kadagiti dagdaga, kasungani iti puntiria ti nasao a programa a makatulong kadagiti nakurapay para iti pannakaitag-ay ti biagda.

Iti pannakairaman dagiti tattao a saan a rumbeng a mairaman iti listaan dagiti benepisario iti conditional cash transfer ti mangited iti dakkel a panagduadua iti panagballigi daytoy a programa ti gobierno a mangtulong kadagiti nakurapay a kakailian.

Kinapudnona, uray idi damo, addan dagiti mangibagbaga a daytoy a gannuat ti gobierno ket saan a solusion iti problema ti kinakurapay ditoy pagilian ken pagtaudan laeng iti anomalia agsipud iti kadakkel ti nailatang a pondo nga agdagup iti P21 bilion (bilion, saan a milion, kaka!) a kasapulan a maikkan iti nainget a panangmonitor tapno saan nga agbalin a pagbagasan dagiti mananggundaway a tattao.

Kinapudnona, nairusat daytoy a programa idi 2008 iti babaen ti administrasion ni nag-Presidente Gloria Macapagal-Arroyo ket naawagan iti Pantawid Pamilyang Pilipino Program wenno 4Ps. Iti panangsublat ni Pres. Benigno Aquino III iti turay, saanna laeng nga intuloy no di ket inkalawana daytoy a programa.

Napintas ti panggep ti conditional cash transfer (CCT) a kangrunaan a panggepna ti pannakatulong dagiti 2.3 milion a kakurapayan kadagiti nakurapay a pamilia tapno maipabassit ti kinakurapay kasta met a maidur-as ti benneg ti salun-at ken edukasion. Ditoy pagiliantayo, mapattapatta nga adda kadagupan a 4.2 milion a nakurapay a pamilia.

Iti babaen daytoy a programa, maikkan dagiti  benepisario a nakurapay a pamilia iti monthly stipend a P500 no la ketdi agtungpalda a mapan agpa-prenatal ken post natal care, agpatsek-ap ken pabakunada dagiti annakda: ken P300 tunggal anakda-  agpatingga laeng iti tallo – no ipatulodda dagitoy nga agbasa iti pagadalan, wenno iti kadagupan a P1,400 a monthly stipend kada benepisario a pamilia. Maited daytoy a benepisio kadagiti mapili a pamilia iti uneg ti lima a tawen.

Idi napalabas a tawen, inlatang ti administrasion Arroyo ti P12 bilion para iti daytoy a programa.

Iti panangikalawa ni Pres. Aquino iti daytoy a programa, immutang ti gobierno iti $400 milion manipud iti Asian Development Bank.

Agdagup iti P21 bilion ti kiniddaw ti DSWD babaen ken ni Social Welfare Secretary Corazon “Dinky” Soliman a maiyalokar para iti daytoy a programa.

Idi inkalintegan ni Soliman ti pondo para ti nasao a programa iti sanguanan ti komite ti aproprasion iti Kamara, kinuna a “pataw iti biag” ti agdagup iti 2.3 a marigrigat a pamilia iti pagilian ti kiniddawna a budget para iti conditional cash transfer.

Impatalged pay ni Soliman ti nainget a pannakaitudo dagiti 2.3 milion a pamilia nga agbalin a benepisario iti CCT.

Ngem ita, serioso nga alegasion ti imbutaktak ni Mayor Mauricio Domogan nga adda dagiti nairaman iti listaan dagiti benepisario iti CCT iti Baguio City a saan met a maibilang a nakurapay.

Imballaag pay ni Domogan a saanna a pirmaan ti listaan dagiti benepisario a matulongan iti babaen ti CCT agingga iti saan a mabigbig dagiti pudpudno a resipiente ti nasao a programa babaen ti pannakinnamayyet ti City Department of Social Welfare and Development.

Serioso daytoy nga alegasion ni Mayor Domogan. Mangted daytoy iti suspetsa nga adda hokus-pokus iti pannakaisagana ti listaan dagiti mabenepisiaran iti nasao a programa.

Kayatna a sawen, saan a naipaay ti nainget ken naan-anay a panagimbestiga ken balidasion kadagiti agbalin a benepisario iti programa.

No napasamak daytoy iti dakkel a siudad a kas iti Baguio City, masinunuo a napasamak met kadagiti dadduma pay a probinsia ken siudad iti pagilian.

(Adda tuloyna)