Footer

KOMENTARIO: Dagiti bangen a sanguen ti Truth Commission (Tuloyna)

Karaman ni Sen. Miriam Defensor-Santiago, maysa a nalaing nga abogada, kadagiti nangbabalaw iti nabuangay a   Truth Commission. Kinunana nga adda legal a depekto daytoy a komision a  kasapulan a risuten pay ti Malakaniang tapno agbalin nga epektibo ti panagimbestigana kadagiti mapapati nga anomalia ti napalabas nga administrasion.

Segun ken ni Santiago, maysa a depekto ti Truth Commission ti kaawan ti bilegna a mangipaulog iti subpoena.

“Kasano a maammuan ti kinapudno no saanka a makaayab iti tao nga agparang iti public hearing?” kinuna ti senadora sana sinaludsod no paggapuan ti pondo a gastuen ti nasao a komision ket saan met nga iggem ti Presidente ti kaha ti pagilian no di ti Kongreso.

Kinuna pay ti senador nga agirekomenda laeng ti Truth Commission ket doblienna laeng ti annongen dagiti prosecutors wenno ti Ombudsman a paggastuan laeng ti pagilian.

Iti met biang ni Senador Juan Ponce Enrile, kasapulan a maibatad no ania ti sakupen ti nasao a komision tapno saanna a saklawen ti annongen dagiti sabali nga ahensia, maikkan iti bileg nga agsubpoena, ken saan nga agkalkalap laeng kadagiti ebidensia.

Kas ninamnama, dinawat dagiti kaaliado ni dati a Presidente ken agdama a congresswoman Arroyo iti Korte Suprema ti pannakawaswas ti Executive Order No. 1 a nangbuangay iti Truth Commission nga agpalutpot kadagiti anomalia a mapapati a napasamak iti administrasion ni Arroyo.

Iti petisionda, kinuna da House Minority Edcel Lagman, Dip. Rodolfo Albano, Jr., Simeon Datumanong ken Orlando Fua, Jr. a maysa nga “exercise in futility” ti Truth Commission agsipud ta duplikaranna laeng ti quasi-judicial a bileg ti Ombudsman ken ti Department of Justice.

Iti petisionda, kinuna dagiti diputado a sinalungasing ti Executive Order No. 1 ti panagsina ti bileg ti ehekutibo ken ti lehislatibo agsipud ta ti laeng lehislatibo ti addaan iti otoridad a mangbuangay iti maysa a public office a kas iti Truth Commission.

Ilehitimo kano ti EO No. 1 agsipud ta saan a las-ud ti Opisina ti Presidente ti bileg a mangipaulog iti executive order.

Sabali pay a gapu a nangkiddawan dagiti diputado a mawaswas ti EO No. 1 ti mapapati a panangsalungasing daytoy iti “equal protection clause” agsipud ta puntiriana laeng a dusaen dagiti ispesipiko a tattao ta saan a nairaman dagiti agtuturay ken opisial ti sabsabali pay nga administrasion, iti napalabas ken iti agdama, a mabalin a maisaklang.

Ngem segun iti Malakaniang, nakatakder iti solido a legal ground ti Truth Commission.

Iti biang ni Sen. Franklin Drilon, nupay inannugotna nga awan ti bileg ti Truth Commission a mangsubpoena iti panagparang ni dati Pres. Arroyo wenno dagiti pribado a tattao kadagiti isayangkatna a public hearing agsipud ta awanan daytoy iti “contempt powers”, pinalagidanna dagiti kritiko iti Executive Order No. 1 nangruna dagiti kaaliado ni dati a Presidente Arroyo gapu ta idi nakatugaw pay ni Arroyo, nangbuangay met kadagiti komision nga agimbestiga.

Madakamat ditoy nga uppat a komision ti binuangay ni dati a Presidente Arroyo: ti Feliciano Commission a nabuangay idi 2003 a nagimbestiga iti Oakwood Mutiny idi Hulio 27, 2003; ti Melo Commission a binukelna tapno agimbestiga mainaig iti mapapati a panagsuitik iti eleksion; ti maysa a komision a nagimbestiga mainaig iti Alabang Boys a naakusaran a naglako ken nagaramat iti narkotiko; ken ti Zenarosa Commission a nabuangay tapno mawara dagiti private armies kalpasan ti pannakapasamak ti massacre sadiay Maguindanao a nakatayan ti 57 a tattao a pakairamanan dagiti kameng ti media.

Ti saludsod: no mabalin idi ni dati a Presidente Arroyo ti nangipaulog iti executive order, apay ket a saanen ken ni Pres. Aquino?

(Maituloyto)