Footer

KOMENTARIO: Dagiti bangen a sanguen ti Truth Commission (Umuna a paset)

No ar-arigen, di pay nangrugi ti panagtrabaho dagiti napili nga agkameng iti Truth Commission, ngem ita pay laeng, nabaton kadagiti pammabalaw ken nabalanganen kadagiti lapped para iti naannayas nga operasionna.

Impaulog itay nabiit ni Pres. Benigno Aquino III ti Executive Order No. 1 a mangipasdek iti maysa a “komision ti kinapudno” a mangimbestiga iti napalabas nga administrasion mainaig kadagiti alegasion ti korapsion ken panagabuso iti kalintegan ti tao.

Kas kinuna ni Pres. Aquino, nabuangay ti “Truth Commission” tapno maikkanen iti kasapulan a pannakaserra dagiti alegasion dagiti dakes nga aramid nga awan ti naipakat a pannusa kadagiti opisial a nagaramid.

Naikkan ti komision iti dua a tawen a mangpalpas iti trabahona ken addaan iti bileg a mangirekomenda ken agipila iti kaso kadagiti naglabsing.

Maipalagip nga idi nagkandidato ni Aquino, nagtaray iti plataporma a “kontra korapsion”. Nangato la ketdi ti panagtalek dagiti umili kenkuana ta intedda ti aglaplapusanan a suporta kenkuana idi eleksion iti laksid a kinasangona ti maysa a dati a presidente a popular pay laeng ti naganna kadagiti tattao ken ti maysa a senador a naggasto iti nagdakkel a kantidad tapno laeng maidur-as ti kandidaturana.

Saan ngarud a dimlaw dagiti tattao idi impalgak ni Pres. Aquino ti panangbuangayna iti maysa a komision nga agimbestiga mainaig iti korapsion ken panagkunniber iti gobierno.

Iti umuna a panagkita dagiti tattao, nabuangay ti Truth Commission a mangpalutpot iti napalabas nga administrasion ni dati a Presidente Gloria Macapagal-Arroyo a maysa itan a congresswoman a mangibagi iti Pampanga kas kadagiti alegasion ti mapapati a panagsuitik iti eleksion idi 2004, kasta met ti saan a nasayaat a pannakaaramat dagiti pondo ti gobierno ken dagiti proyekto a nabungon kadagiti anomalia.

Ni retirado a Supreme Court Chief Justice Hilario Davide, Jr. ti napili ni Pres. Aquino a mangidaulo iti Truth Commission.

Ngem iti pannakapili ni Davide, addan dagiti nadismaya ken sineknan iti panagduadua iti magapuanan ti komision.

Apay a ni Davide idinto a naggadu a sabali a mabalin a pilien ni Pres. Aquino a mangidaulo iti Truth Commission a dakkel a pangnamnamaan dagiti tattao a manglukais kadagiti mapapati nga anomalia ken korapsion iti napalabas nga administrasion?

No taliawentayo ti napalabas, ni Davide ti namagsapata ken ni dati a Presidente Arroyo idi 2000 kalpasan ti yuulog ni Joseph Estrada iti puestona maigapu iti insayangkat dagiti umili a people power gapu iti mapapati a korapsion a nakaisawsawan daytoy.

Idi nagretiro ni Davide a chief justice ti Korte Suprema, dagus a dinutokan ni Arroyo a permanente a pannakabagi ti Pilipinas iti United Nations.

Ngem dakkel la ketdi ti panagtalek ni Pres. Aquino ken ni Davide isu a pinilina daytoy a mangidaulo iti Truth Commission. Kasta met nga imbatad ni Davide ti saan koma a panag-speculate dagiti tattao idinto nga  impasingkedna nga aramiden ti komision ti naituding a pagrebbenganna.

Naikkan ti Truth Commission iti dua a tawen a mangileppas iti trabahona.

Ngem iti daytoy a kasapana, imballaagen dagiti kaaliado ni dati a Presidente Arroyo a kuestionaranda ti konstitusionalidad ti pannakabuangay ti Truth Commission iti Korte Suprema.

Segun ken ni Diputado Edcel Lagman,  marigatan ti Malakaniang a mangikalintegan ti pannakabuangay ti komision agsipud ta adda posible a konstitusional a pagkapsutan wenno depekto daytoy.

No patien ti nasao a diputado, naited iti Kongreso ti bileg a mangbuangay iti ahensia wenno komision ken mangpundo iti daytoy a saan ketdi nga iti ehekutibo.

Innayon pay daytoy nga addan dagiti agdama nga ahensia a nakaipabaklayan iti konstitusional a pammilin nga agimbestiga kadagiti kaso ti panagkunniber ken korapsion ket duplikaran wenno saklawen laeng ti nabuangay a komision dagiti pagannonganda.

Iti kapanunotan ni Senador Joker Arroyo, inutil ti komision a binuangay ni Pres. Aquino agsipud ta awan ti bilegna a mangsubpoena iti kayatna a paayaban.

“Mabalinna ti agawis ngem saanna a mapilit ti ayabanna nga agatendar,” kinuna ni Arroyo.

Iti sabali a pannao, maysa laeng tigre nga awanan ngipen ti nasao a komision!

(Adda tuloyna)