KOMENTARIO: HB 465, aturenna ti saan nga umisu a pannakakanta ti National Anthem

Maysa kadagiti makapaganaygay-rikna a napasamak iti maika-15 a Kongreso ti pannakaipasa iti maikadua a pannakaibasana ti House Bill 465 wenno An Act Prescribing the Code of the National Flag, Anthem, Motto, Coat-of-Arms and Other Heraldic Items and Devices of the Philippines. No agbalin a linteg, mamulta ti asinoman nga aglabsing iti P100,000.00 ken mabalud pay iti dua a tawen a kas kanayonan a pannusa.

Napapanawen daytoy a gakat agsipud ta kapaliiwan a saan a masursurot ti pannakakanta ti national anthem aglalo kadagiti internasional a pasken. Ta ngamin kadagiti kallabes, naynay a malablabsing ti umno a pannakakanta ti national anthem, lalo kadagiti laban ni Pambansang Kamao Manny Pacquiao. Binaliwan ngamin dagiti kumakanta a natudingan a mangkanta iti national anthem saan laeng ti tono ti kanta no di pay ti wagas ti pannakakantana. Banag a dakkel a nagmisuotan dagiti adda iti National Historical Institute a mangitaktakder a rumbeng a makanta ti nailian a kanta kas iti orihinal a pannakakomposna ken musical rendition babaen ken ni Julian Felipe.

Kadagiti pannakiboksing ni Pacquiao, namin-adu a naulit-ulit ti pannakalabsing ti pannakakanta ti national anthem. Naulit-ulit met dagiti pammabalaw kadagiti nagkanta. Ngem kalpasan ti sumagmamano a lawas, maikupin manen ti isyo nga awan ti nadusa wenno namulta.

Imbag ta iti panangkanta ni Charice Pempengco iti national anthem, saanna a sinabalian ti tono ti kanta, ta ammonan nga adu manen ti agpalpaliiw. Ken adu la ketdi dagiti tumaud a kritisismo ken misuot no binaliwanna met ti pannakakanta ti national anthem.

Nupay iti kannawidan dagiti kansion ket mabalin a balbaliwan ti tonona a kas maiyataday iti bersion a kayat ti kumakanta, ngem kadaytoy nga isyo, kunaenmi met a saan a maiyataday nga aramid wenno saan a rumbeng a baliwan ti tono ti national anthem ta kaipapananna metten ti saan a panangdayaw iti cultural heritage wenno saan a panangitakder iti kannawidan a sinalsaluadan dagiti immuna a kaputotan aglalo dagiti maingel a bannuartayo. No saantayo a dayawen ti kannawidan a sinaluadan dagiti bannuartayo, kaipapananna metten ti saantayo a panangdayaw a mismo kadakuada.

Ti pannakakanta ti nailian a kanta ket segun iti komposision ken musical arrangement ni Julian Felipe. Addaan daytoy iti β€œ2/4 beat no matokar; wenno iti uneg tiΒ  range a 100 agingga iti 120 metronome, iti 4/4 beat no makanta.” Iti ababa a pannao, martsa daytoy a saanen a nasken a mabalbaliwan, ta no saan a masurot, agbaliw metten ti nakaisangratanna a gagem. Saan a rumbeng nga iyataday iti uso wenno isurot kadagiti popular a kankansion.

Babaen kadaytoy nga HB 465, awanto ngatan ti mangbalusingsing iti pannakakantana lalo kadagiti internasional a pasken agsipud ta natudingan ti National Historical Institute a mangirakurak ken mangited iti sapasap iti official music score sheet para itoy. Laglagipentyo koma a kanayon nga agpalpaliiw ken nakamulagat ti National Historical Institute (NHI) no umno met laeng wenno saan ti panangkanta iti nailian a kansion. Iti kallabes, saan a nagkurang ti NHI a nangited iti balakad iti umno a panangkanta iti nailian a kanta sakbay iti pasken ngem adda latta met dagiti saan a paisuro. Daytoy ti panggep nga aturen ti nasao a gakat.

β€œAd-adun ti ngipen ti gakat. Panggepna a pabaruen ti linteg iti sanguanan dagiti kontemporario a panagbaliw ti kaugalian ken pagsasao,” kinuna ni Sorsogon Representative Salvador Escudero, chairman ti committee on basic education and culture, ken maysa kadagiti author iti nasao a bill.

β€œ… Ipasagepsepna ti patrotismo ken nasionalismo kadagiti Filipino iti amin nga edag,” kinuna met ni Cagayan de Oro Representative Rufus Rodriguez, sabali pay nga author ti bill.

Iti masungad a laban manen ni Pambansang Kamao, namnamaenmi a makansionen ti nailian a kanta a kas iti umno ken orihinal a nakaisangratanna.#